Grand Chess Tour 2019”: Şəhriyar Məmmədyarovun növbəti rəqibi Fabiano Karuana olacaq
Bakı, 6 iyul, AZƏRTAC
İyulun 6-da Xorvatiyanın paytaxtı Zaqrebdə keçirilən “Grand Chess Tour 2019” seriyasının ikinci mərhələsi çərçivəsində 10-cu tura start veriləcək.
AZƏRTAC xəbər verir ki, nüfuzlu turnirdə iştirak edən Azərbaycan şahmatçısı Şəhriyar Məmmədyarovun bu turda rəqibi amerikalı Fabiano Karuana olacaq. Turun digər oyunlarında amerikalı Uesli So norveçli dünya çempionu Maqnus Karlsen, fransalı Maksim Vaşe-Laqrav rusiyalı Yan Nepomnyaşi, çinli Dinq Liren ermənistanlı Levon Aronyan, hollandiyalı Aniş Giri amerikalı Hikaru Nakamura, sabiq dünya çempionu hindistanlı Vişvanatan Anand rusiyalı Sergey Karyakin ilə qarşılaşacaqlar.
Ötən turda şahmatçımız Ş.Məmmədyarov V.Anand üzərində qələbə qazanıb. Bu, şahmatçımızın turnirdə ilk qələbəsi olub. Bu qələbə sayəsində təmsilçimiz autsayderlər qrupundan çıxıb. Ş.Məmmədyarov ötən turlarda 5 dəfə heç-heçə edib, 3 dəfə məğlub olub. Turun digər oyunları heç-heçə başa çatıb.
Beləliklə, 9 turun nəticələrinə əsasən hazırda şahmatçımızın aktivində 3,5 xal var. M.Karlsen 6,5 xalla liderliyini davam etdirir. U.So 6, F.Karuana, L.Aronyan, Y.Nepomnyaşi 5, D.Liren 4,5, S.Karyakin, M.Vaşe Laqrav, A.Giri 4, V.Anand 3,5, H.Nakamura 2,5 xal toplayıblar.
Bölmənin digər xəbərləri
