GÜRCÜSTANIN ƏRAZİ SULARINI POZAN TÜRK GƏMİSİ 50 MİN LARİ MƏBLƏĞİNDƏ CƏRİMƏLƏNƏCƏKDİR

13.08.2004 [21:11]
Çap et
A⁺ A^-

AZƏRTAC-ın xüsusi müxbiri xəbər verir ki, Gürcüstan Baş Sahil Mühafizə İdarəsi əməliyyat xidmətinin əməkdaşları Oçamçiru rayonunun Qaqida kəndi yaxınlığında Türkiyə bayrağı altında üzən “Ertuk” yük gəmisini tutmuşlar.

Əməliyyat xidmətinin rəisi Koba Boçorişvili qeyd etmişdir ki, “Ertuk” gəmisi Potidən Rusiyanın Novorossiysk limanına getməli idi, ancaq heyət istiqaməti dəyişdirib Abxaziyaya tərəf üzmüşdür. Gəminin kapitanı bunu dənizdə görünüş dairəsinin pis olması ilə izah etmişdir. Ancaq biz bu dəlilə inanmırıq. Çünki aldığımız məlumata görə, həmin gəmini Oçamçiruda gözləyirdilər. Təəssüf ki, bu, “Ertuk” gəmisi kapitanının Gürcüstanın sərhədini pozduğu birinci hal deyildir.

Gürcüstan qanununa müvafiq olaraq “Ertuk” gəmiçilik qaydalarını pozduğuna görə, 50 min lari məbləğində cərimələnəcəkdir.