Hər daşında bir tarix yaşayan Damcılı mağarası VİDEO
Qazax, 14 avqust, Ruslan Novruzoğlu, AZƏRTAC
AZƏRTAC-ın “Mən turist olsaydım” rubrikası: Qazax rayonunda yerləşən Damcılı mağarası.
Qazax rayonunda yerləşən “Avey” Dövlət Tarix-Mədəniyyət Qoruğunun ərazisindəki Damcılı mağarasında aparılan arxeoloji qazıntılar nəticəsində bu ərazinin çox qədim - min illər əvvələ aid olduğu müəyyən edilib.
Damcılı mağarası Qazaxın Daş Salahlı kəndi yaxınlığında, Avey dağının ətəyindədir. Ərazidə ilkin arxeoloji tədqiqatlar ilk dəfə 1953-cü ildə aparılıb. 2015-ci ildə Mədəniyyət Nazirliyinin təşəbbüsü ilə “Avey” Dövlət Tarix-Mədəniyyət Qoruğu, AMEA-nın Arxeologiya və Etnoqrafiya İnstitutu, Yaponiyanın Tokio Muzey Universiteti arasında imzalanan üçtərəfli beynəlxalq memoranduma əsasən, qoruğun “Damcılı” filialı ərazisində Damcılı mağara düşərgəsinin ətrafında aparılan arxeoloji qazıntılarda tarixin bütün mərhələlərinə - Paleolit, Mezolit, Neolit, Eneolit və sonrakı digər dövrlərə aid 5 minə yaxın əmək alətləri, maddi-mədəniyyət nümunələri aşkar edilib.
Damcılı mağarasının yerləşdiyi Avey dağı müxtəlif tarixi dövrlərə təsadüf edən maddi-mədəniyyət, arxeologiya və memarlıq abidələri ilə zəngindir. Ərazidə 8 məbəd, 2 qədim yaşayış yeri, İlk Orta əsrlərə aid qəbiristanlıq, müdafiə divarları və bürcləri olan 2 qala qalığı, 30-a qədər mağara qeydə alınıb. “Avey” Dövlət Tarix-Mədəniyyət Qoruğunun ərazisində ümumilikdə 56 abidə var.
İnsanlar ilin dörd fəslində “Avey” qoruğunun ərazisindəki məşhur Damcılı bulağına gəlir, burada istirahət edirlər. Yay aylarında isə Damcılıya gələnlər daha çox olur.
Bölmənin digər xəbərləri
