Hesabat: Bərpaolunan mənbələr elektrik enerjisi istehsalında ilk dəfə kömürü üstələyib
Bakı, 7 oktyabr, AZƏRTAC
Beynəlxalq enerji analitikası agentliyi “Ember”in son hesabatında bildirilir ki, bərpaolunan mənbələr elektrik enerjisi istehsalında ilk dəfə kömürü üstələyib.
AZƏRTAC agentliyin hesabatına istinadla xəbər verir ki, bu ilin birinci yarısında qlobal elektrik tələbatı illik müqayisədə 2,6 faiz artıb. Hesabat dövründə günəş və külək enerjisi istehsalı elektrik enerjisinə olan tələbatı üstələyib və tələbat artımını tam şəkildə ödəyib. Bu, qazıntı yanacaqlarından elektrik enerjisi istehsalının bir qədər azalmasına səbəb olub.
Hesabata görə, cari ilin birinci yarısında qlobal elektrik enerjisi istehsalının 8,8 faizi günəş, 9,2 faizi külək, 13,9 faizi isə su elektrik enerjisinin payına düşüb. Digər bərpaolunan mənbələr isə 2,3 faiz təşkil edib. Eyni zamanda, dünya elektrik enerjisi istehsalının 34,2 faizi bərpaolunan enerji mənbələrinin payına düşüb. Həmin dövrdə kömürdən elektrik enerjisi istehsalı cəmi 33,1 faiz təşkil edib.
Bərpaolunan enerji mənbələrindən elektrik enerjisi istehsalı ilk dəfə olaraq kömürü ötüb. Bu dövr ərzində bərpa olunan enerji mənbələri hesabına 5072 teravatt-saat, kömürdən isə 4896 teravatt-saat elektrik enerjisi istehsal edilib.
Elektrik enerjisi istehsalının 20,7 faizi qazın, 9,1 faizi isə nüvə enerjisinin payına düşüb. İstehsalın qalan hissəsi digər qazıntı yanacaqlarından əldə edilib.
Kömürün qlobal elektrik enerjisi istehsalındakı payı ilin birinci yarısında illik müqayisədə 0,6 faiz, qazın payı isə 0,2 faiz azalıb. Bu azalma həm də elektrik enerjisi sektorundan emissiyaların 0,2 faiz azalmasına səbəb olub.
Dünyanın ən böyük iqtisadiyyatları olan Çin, ABŞ, Hindistan və Avropa İttifaqı (Aİ) qlobal elektrik enerjisi istehsalında üstünlük təşkil etməkdə davam edir. Çin və Hindistanın qazıntı yanacağından elektrik enerjisi istehsalı ilin birinci yarısında azalıb, təmiz enerji mənbələrindən istehsal isə artıb. Çin dünyanın təmiz enerji lideri mövqeyini qoruyub saxlayıb, Hindistanda bərpaolunan enerji istehsalı hesabat dövründə elektrik enerjisinə tələbatın artımını üstələyib. Bu iki ölkədən fərqli olaraq, ABŞ və Aİ-də qazıntı yanacaqlarından elektrik enerjisi istehsalı artıb.
“Ember” qeyd edir ki, qlobal miqyasda bərpaolunan enerji mənbələrindən elektrik enerjisi istehsalı tələb artımı ilə birbaşa mütənasib olaraq artsa da, ölkələr üzrə irəliləyiş əhəmiyyətli dərəcədə dəyişir. Agentliyin baş analitiki Małgorzata Viatros-Motıka bildirib ki, elektrik enerjisi istehsalında kritik dönüş nöqtəsinin ilk əlamətləri görünür. “Günəş və külək dünyanın elektrik enerjisi istehsalı tələbini qarşılamaq üçün kifayət qədər sürətlə böyüyür. Bu, təmiz enerjinin elektrik tələbatının sürətlə artması fonunda davam etdiyi bir transformasiyanın başlanğıcından xəbər verir”, -deyə o vurğulayıb.
Bölmənin digər xəbərləri
