“Heydər Əliyev irsinin təşviqi innovativ həllərdə”
Rəqəmsal İdeya Müsabiqəsinin bağlanış mərasimi keçirilib
Bakı, 17 iyun, AZƏRTAC
İyunun 17-də Yeni Azərbaycan Partiyasının (YAP) Mərkəzi Aparatı, YAP Gənclər Birliyi və Bakı Ali Neft Məktəbinin birgə təşkilatçılığı ilə Ümummilli Lider Heydər Əliyevin anadan olmasının 100-cü ildönümünə həsr olunmuş “Heydər Əliyev irsinin təşviqi innovativ həllərdə” Rəqəmsal İdeya Müsabiqəsinin bağlanış mərasimi keçirilib.
AZƏRTAC xəbər verir ki, əvvəlcə tədbir iştirakçıları Bakı Ali Neft Məktəbinin inzibati binasında müasir müstəqil Azərbaycan dövlətinin banisi, xalqımızın Ümummilli Lideri Heydər Əliyevin büstü önünə gül dəstələri düzüb, Ulu Öndərin əziz xatirəsini ehtiramla yad ediblər.
Tədbirdə Dövlət Himni səsləndirilib. Ümummilli Lider Heydər Əliyevin və Azərbaycanın ərazi bütövlüyü uğrunda canlarını qurban vermiş şəhidlərimizin xatirəsi bir dəqiqəlik sükutla yad edilib.
Daha sonra Rəqəmsal İdeya Müsabiqəsi barədə videoçarx nümayiş olunub.
YAP Gənclər Birliyinin sədri Bəxtiyar İslamov müsabiqə haqqında məlumat verərək bildirib ki, “Heydər Əliyev İli” çərçivəsində keçirilən müsabiqənin əsas məqsədi Yeni Azərbaycan Partiyasının gənc fəallarının innovasiyayönümlü potensialının aşkarlanması, komanda quruculuğu bacarıqlarının təkmilləşdirilməsi və ölkəmizdəki innovasiya ekosistemində gənclərin iştirakçılığının artırılmasıdır. Qeyd edilib ki, müsabiqə üçün respublikanın 63 inzibati ərazi vahidindən 1372 gənc müraciət edib. Onlardan 120 nəfər seçilərək 30 fərqli komandada yarışıblar. Onlardan 10-u finala vəsiqə qazanıb. Münsiflər heyəti tərəfindən 3 qalib komanda müəyyən edilib.
Daha sonra qalib komandalar mükafatlandırılıb. Birinci, ikinci və üçüncü yerləri tutmuş komandalara müvafiq diplomlar, xatirə hədiyyələri, qalib komandaya isə əlavə olaraq kubok təqdim olunub.
Tədbirdə çıxış edən YAP Sədrinin müavini - Mərkəzi Aparatın rəhbəri Tahir Budaqov bildirib ki, 2023-cü il Azərbaycan xalqı üçün olduqca əlamətdardır: “Prezident İlham Əliyevin Sərəncamı ilə 2023-cü il Azərbaycanda “Heydər Əliyev İli” elan olunub. “Heydər Əliyev İli” çərçivəsində həm respublikamızda, həm də onun hüdudlarından kənarda silsilə tədbirlər keçirilir, müdrik dövlət xadiminin zəngin dövlətçilik irsinə hərtərəfli nəzər salınır”.
Tahir Budaqov qeyd edib ki, Heydər Əliyev yeni Azərbaycan reallığını və ölkəmizin parlaq gələcəyinin etibarlı bünövrəsini yaradıb.
Qeyd olunub ki, Ulu Öndər Heydər Əliyev Azərbaycan gəncliyinə də hər zaman yüksək diqqət və qayğı göstərib. Heydər Əliyev tərəfindən əsası qoyulan dövlət gənclər siyasəti Azərbaycan Prezidenti, Yeni Azərbaycan Partiyasının Sədri İlham Əliyev tərəfindən uğurla davam etdirilir”.
Ulu Öndərin əbədiyaşar ideyalarının yeni nəslə aşılanmasının xüsusi önəm daşıdığını diqqətə çatdıran Tahir Budaqov vurğulayıb ki, “Heydər Əliyev İli” çərçivəsində keçirilən Rəqəmsal İdeya Müsabiqəsi Ulu Öndərin zəngin irsinin yeni yanaşmalar əsasında öyrənilməsi və gənclərimizin innovativ potensialının gücləndirilməsi baxımından mühüm əhəmiyyətə malikdir.
Bakı Ali Neft Məktəbinin rektoru, YAP İdarə Heyətinin üzvü Elmar Qasımov qeyd edib ki, ölkəmizdə neft kapitalının insan kapitalına çevrilməsi istiqamətində mühüm tədbirlər həyata keçirilir. Bu siyasətin nəticələri gənclərimizin uğurlarında öz əksini tapır.
Rektor gənclərin inkişafında, bilik və bacarıqlarının artırılmasında mühüm rol oynayan belə müsabiqələrin təşkilinin ənənəyə çevrilməsini müsbət hal kimi dəyərləndirib. O müsabiqənin gənclərin inkişafında, onların potensialının, bilik və bacarıqlarının artırılmasında mühüm əhəmiyyətə malik olduğunu vurğulayıb
“Heydər Əliyev İli” çərçivəsində keçirilən tədbirlərin əhəmiyyətindən bəhs edən Elşad Mirbəşiroğlu YAP-ın hər zaman kreativ ideyalarla çıxış etdiyini bildirib. O, belə layihələrin gənclərin inkişafına xidmət etdiyini diqqətə çatdırıb.
Bölmənin digər xəbərləri
