Hindistan və Çinin neftə tələbatının artması “qara qızıl”ı bahalaşdırıb
Bakı, 12 fevral, AZƏRTAC
Hindistanın sahil mühafizə xidməti neft qaçaqmalçılığı ilə məşğul olan 3 tankeri həbs edib. Mumbay limanından təxminən 100 dəniz mili aralıda üzən tankerlərin göyərtəsindəki neftin miqdarı müəyyən edilir. Bu tankerlər sanksiya altında olan İran və Rusiyaya məxsus xam nefti alıcıya çatdırmaq istəyirdilər. Ucuz neftin alıcısı da müəyyən edilir.
AZƏRTAC xəbər verir ki, ABŞ-da fəaliyyət göstərən və neft nəqli üçün onlayn xidmət göstərən “TankerTrackers.com” saytı qeyd edir ki, “Al Jafzia” adlı tanker Nikaraqua, “Asphalt Star” adlı tanker Mali, “Stellar Ruby” adlı tanker isə İran bayrağı ilə açıq dənizə çıxıblar.
İlkin məlumatlara əsasən, tankerlər Rusiya neftini Hindistana çatdırmalı idilər. Lakin tankerlər açıq dənizdə olduğu və mənzilbaşına çatmamış Avropa İttifaqı (Aİ) Rusiyaya qarşı sanksiyaların 20-ci paketini açıqladığı üçün bu, onların həbsi ilə nəticələnib.
“Reuters” agentliyinin məlumatına əsasən, sanksiyalardan çəkinən Hindistanın “Indian Oil”, “Bharat Petroleum” və “Reliance Industries” neft ticarəti ilə məşğul olan korporasiyaları mart və aprel ayları üçün sifarişlərini geri götürərək Rusiya neftindən tamamilə imtina ediblər. Yerli mətbuat iddia edir ki, nefti bu 3 şirkət sifariş vermişdi. Lakin Aİ və ABŞ tərəfindən sanksiyaların daha da kəskinləşməsi onları qaçaq neft almaqdan imtina etməyə məcbur edib.
“The Wall Street Journal” yazır ki, ABŞ Prezidenti Donald Tramp İran neftini daşıyan tankerlərin həbs edilməsi barədə əmr vermişdi. Nəticə isə ondan ibarət olacaqdı ki, İran Hörmüz boğazını bağlayaraq dünya bazarına neft ixracını məhdudlaşdıracaqdı ki, bu da hədsiz bahalaşmaya gətirib çıxaracaqdı. İndiki zamanda isə ABŞ iqtisadiyyatı heç də özünün yaxşı dövrünü yaşamır və belə vəziyyətdə neftin dünya bazarında bahalaşması rəsmi Vaşinqton üçün qətiyyən səmərəli deyil.
ABŞ-da neft ehtiyatlarının 8,5 milyon barel artması və Hindistan ilə Çində sanksiyalar səbəbi ilə neftə tələbatın artması, eyni zamanda, İran ətrafında vəziyyətin gərgin olaraq qalması dünya bazarında neftin qiymətinin bahalaşmasına səbəb olub.
Hazırda “Brent” markalı neftin 1 barelinin qiyməti 70 dolları ötüb. Azərbaycanın “Azeri Light” markalı neftin bir barelinin qiyməti isə 1,06 dollar və ya 1,49 faiz artaraq 72,2 dollar olub.
Bölmənin digər xəbərləri
