DÜNYA
İbrahim Yumaklı: Türkiyə ərzaq məhsullarının ixracını 40 milyard dollara çatdırmağı planlaşdırır
Ankara, 7 mart, AZƏRTAC
Türkiyədən ərzaq məhsullarının ixrac həcminin 40 milyard dollara çatdırılması planlaşdırılır.
AZƏRTAC xəbər verir ki, bu fikri Türkiyənin kənd və meşə təsərrüfatı naziri İbrahim Yumaklı bildirib.
Nazirin sözlərinə görə, ayrı-ayrı regionlar üçün daha məhsuldar olan kənd təsərrüfatı bitkiləri haqqında məlumatın yerləşdiyi Türkiyə fermerlərinin vahid sisteminin formalaşdırılması istiqamətində işlər aparılır.
“Sistem artıq sentyabrda tam fəaliyyət göstərməyə başlayacaq. Fermerlərin əkin zamanı hansı bitkinin daha çox fayda gətirəcəyi barədə təsəvvürləri olacaq. Söhbət Türkiyənin ərzaq təhlükəsizliyinə töhfədən və ixrac üçün yeni stimuldan gedir”, - deyə Yumaklı bildirib.
Qurumun başçısı 2023-cü ilin yekunlarına görə Türkiyənin aqrosənaye kompleksi məhsullarının ixracının 31 milyard dollar təşkil etdiyini vurğulayıb. “Biz bu göstəricini 40 milyard dollara çatdırmağı hədəf götürmüşük”, - deyə o əlavə edib.
Nazir aqrar sektorun stimullaşdırılması tədbirlərini, o cümlədən fermerlərdən Dövlət Torpaq Məhsulları Ofisinin xətti ilə təxminən 13 milyon ton məhsulun alınmasını da xatırladıb.