İki boksçumuz dünya çempionatına qələbə ilə başlayıb
Bakı, 16 noyabr, AZƏRTAC
İspaniyanın Alikante şəhərində gənc boksçular arasında dünya çempionatına start verilib.
Azərbaycan Boks Federasiyasından AZƏRTAC-a bildiriblər ki, mundialın ilk günündə Azərbaycan milli komandasının 2 üzvü mərhələ adlayıb.
Boksçularımızdan Sənan Hətəmov (67 kq) Neri Kanaviri (Boliviya) ilə qarşılaşıb. Otuz ikidəbir final mərhələsi çərçivəsində baş tutan görüş təmsilçimizin qələbəsi ilə başa çatıb. O, rəqibini tam üstünlüklə məğlub edib. Hətəmov növbəti döyüşündə ilk mərhələdən azad olan kanadalı Yakub Blaislə üz-üzə gələcək.
Mehparə Məmmədova (48 kq) da rinqdən qalib ayrılıb. On altıdabir final mərhələsində Lyuba Atanasova (Bolqarıstan) ilə döyüşən boksçumuz rəqibinin üçüncü raundda diskvalifikasiya olunması səbəbindən növbəti görüşə vəsiqə qazanıb. Məmmədova ikinci cəhdində monqolustanlı Saruul Batsayxanla qüvvəsini sınayacaq.
Onlardan fərqli, Tural Sarıyev (48 kq) Titivat Flonqauraiyə (Tayland), Rza Rzazadə (75 kq) Antonio Leyvaya (Argentina) məğlub olaraq mübarizəni dayandırıblar.
Qeyd edək ki, dünya çempionatında bu gün daha 2 boksçumuz mübarizəyə qoşulacaq. Kamil Babayev (54 kq) Riçard Erazo Çaçanı (Ekvador), Aysu Dərvişova (57 kq) Quadalupe Peresi (ABŞ) sınağa çəkəcək.
Bölmənin digər xəbərləri
