İkinci rübdə Enerji Məsələlərini Tənzimləmə Agentliyinə 1714 vətəndaş müraciət edib
Bakı, 9 iyul, AZƏRTAC
Cari ilin ikinci rübündə istehlakçıların hüquqlarının qorunması, abonentlərin elektrik və istilik enerjisi, təbii qazla təchizatı və digər məsələlərlə bağlı Enerji Məsələlərini Tənzimləmə Agentliyinə (AERA) bilavasitə və Energetika Nazirliyindən 1714 müraciət daxil olub.
Agentlikdən AZƏRTAC-a bildirilib ki, elektrik enerjisi təchizatı ilə bağlı 79-u məlumat xarakterli olmaqla 1349 müraciət daxil olub. Bu göstərici birinci rüblə müqayisədə 258 müraciət və ya 24 faiz çoxdur. Təbii qaz təchizatı ilə bağlı 12-si məlumat xarakterli olmaqla 171 müraciət daxil olub ki, bu da birinci rüblə müqayisədə 170 müraciət və ya 49,8 faiz azdır.
İstilik təchizatı ilə bağlı biri məlumat xarakterli olmaqla 10 müraciət daxil olub. Bu, ilin birinci rübü ilə müqayisədə 12 müraciət və ya 54,5 faiz azdır. Digər məsələlərlə bağlı 43-ü məlumat xarakterli olmaqla 184 müraciət daxil olub ki, bu da birinci rüblə müqayisədə 74 müraciət və ya 29 faiz azdır.
1714 müraciətdən 1103-ü agentlik tərəfindən araşdırılıb və cavablandırılıb (15 müraciət müvafiq qaydada baxılması və tədbir görülməsi üçün aidiyyəti qurumlara göndərilib), 2 müraciət Energetika Nazirliyi ilə müştərək icra olunub, 474-ü hazırda baxılma prosesindədir, 135 məlumat xarakterli müraciətdən 33-ü qaldırılan problemlərin həlli ilə bağlı təşəkkür məktubu olub.
Bölmənin digər xəbərləri
