İlqar Orucov: “Heydər Əliyev adına təqaüd” tələbələr arasında rəqabət mühiti yaradacaq
Bakı, 24 iyun, AZƏRTAC
Prezident İlham Əliyevin imzaladığı Sərəncamla Azərbaycan Respublikasının ali təhsil müəssisələrində ali təhsilin bakalavriat (əsas (baza ali) tibb təhsili) səviyyəsində əyani formada təhsil alan, təhsildə yüksək nailiyyətləri olan 100 (yüz) nəfər tələbə üçün “Heydər Əliyev adına təqaüd” təsis edilib. Bu, dövlət büdcəsi hesabına veriləcək birdəfəlik təqaüddür və məbləğ kifayət qədər yüksəkdir.
Bu fikirləri AZƏRTAC-a açıqlamasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov deyib. O bildirib ki, təqaüd tələbələri motivasiya edəcək və onların arasında yaxşı rəqabət mühiti yaradacaq.
Qeyd edib ki, təqaüdün Ulu Öndər Heydər Əliyevin 100 illiyində təsis edilməsi təsadüfi deyil.
“Ümummilli Lider Heydər Əliyev hər zaman Azərbaycanda təhsilə, elmə və tələbələrə həssas münasibət bəsləyirdi. Ulu Öndər Azərbaycana rəhbərliyinin istər birinci dövründə, istərsə də dövlətimiz müstəqillik əldə etdikdən sonra hər zaman gənclərə, təhsilə böyük diqqət və qayğı ilə yanaşırdı. Təhsil, elm adamı olaraq düşünürəm ki, bu təqaüdün təsis edilməsi təhsil adına çox böyük addımdır. Ulu Öndər Heydər Əliyevin Azərbaycana rəhbərlik etdiyi birinci dövrdə Azərbaycanda universitetlərin inkişaf etdirilməsi, gənclərimizin ən yaxşı universitetlərdə təhsil alması onun adı ilə bağlıdır. O zaman bütün respublikalarda keçmiş SSRİ-nin nüfuzlu universitetlərində tələbələr təhsil almağa göndərilirdi. Ulu Öndərin sayəsində Azərbaycandan göndərilən tələbələrin sayı hər zaman çoxluq təşkil edirdi. O zaman ölkənin müstəqil olmamasına baxmayaraq, respublikanın inkişafına hədəflənmiş istiqamətlər və ixtisaslar üzrə tələbələrin göndərilməsi Azərbaycanın gələcəyinə, eyni zamanda, onun müstəqilliyinə hədəflənmiş addım idi. Təsadüfi deyil ki, Ulu Öndərin ölkəyə rəhbərlik etdiyi müstəqillik illərində göndərdiyi həmin tələbələr peşəkar kadrlar kimi respublikamızın kadr potensialının formalaşmasında müstəsna rol oynayıblar. Gənclərin birinci, ikinci forumlarının keçirilməsi və müstəqil Azərbaycanın gənclər siyasətinin formalaşdırılması birmənalı olaraq Ulu Öndərin adı ilə bağlıdır. Heydər Əliyev Azərbaycanda gənclər siyasətini müəyyənləşdirərkən bir neçə parametr üzrə Azərbaycan gənclərinin obrazını yaradırdı. Hər zaman qeyd edirdi ki, Azərbaycan gəncləri təhsilli, savadlı, bilikli olmalıdırlar. Bunun üçün praktiki işlər görülürdü, müxtəlif proqramlar həyata keçirilirdi. Hətta o zaman belə gənclər üçün müxtəlif təqaüdlər təsis edilirdi. Bunlar Ulu Öndərin adı ilə bağlıdır. Sonrakı illərdə bu işlər Prezident İlham Əliyev tərəfindən uğurla davam etdirilir. Prezidentin “Heydər Əliyev adına təqaüd”ün təsis edilməsi ilə bağlı addımı həm də təməl prinsiplərinə sadiqlikdən irəli gəlir. Bu təqaüd Azərbaycan gənclərinin yaxşı oxumasına ünvanlanmış hüquqi sənəd kimi olduqca dəyərlidir. Müstəqil dövlətimizin ali təhsil alan gənclərinin bu təqaüd uğrunda təhsildə rəqabətə qoşulmasını gözləyirəm. Sərəncamda qeyd olunur ki, 100 tələbəyə 3000 manat məbləğində birdəfəlik təqaüd verilsin. Təqaüdün verilməsi Elm və Təhsil Nazirliyinə həvalə olundu. Təqaüdün həm də bir mənəvi stimulu var. Bu təqaüdü alan 100 gənc həm də Ulu Öndərin adına, arzularına, görmək istədiyi savadlı gəncliyə layiq təhsil almaq uğrunda çalışacaq. Onlar gələcəkdə Azərbaycan dövlətinə layiqincə xidmət edəcəklər”, - deyə İlqar Orucov fikrini yekunlaşdırıb.
Bölmənin digər xəbərləri
