İndoneziya COVID-19-a qarşı mübarizə təbirlərini gücləndirir
Tokio, 8 iyul, AZƏRTAC
İyulun 7-dən başlayaraq İndoneziya hökuməti ölkədə COVID-19-un ən təhlükəli dalğasının yayılması ilə əlaqədar koronavirusa qarşı mübarizə tədbirlərini genişləndirib. Bildirilir ki, qarşıda daha ağır vəziyyət gözlənilir.
AZƏRTAC xəbər verir ki, Cənub-Şərqi Asiya arxipelaqını əhatə edən “delta” ştamına qarşı yeni tədbirlər Sumatra adasından başlayaraq, ölkənin ən şərq sahillərində yerləşən Papua adalarına qədər ərazilərdə tətbiq ediləcək. Daha təhlükəli olan yeni ştamın qarşısını almaq üçün ölkə hökuməti tətbiq edilən məhdudiyyətləri iyulun 20-dək uzatmağı qərara alıb.
Bildirilir ki, hazırda bütün ölkə üzrə xəstəxanalar tam dolub və bu səhiyyə sistemini çox gərgin vəziyyətə salıb.
İndoneziyada gündəlik yoluxma sayı 34 min 379 nəfərə çatıb və 1040 ölüm halı qeydə alınıb ki, bu da ən böyük antirekorddur. Artıq dörd gündür ki, ölkə üzrə koronavirusdan ölənlərin sayında antirekord qeydə alınır. İndiyədək İndoneziyada ümumilikdə 2 milyon 379 min 297 nəfərin koronavirusa yoluxduğu, 62 min 908 nəfərin isə həyatını itirdiyi qeyd edilir.
Tətbiq edilən yeni qadağalar ikinci dərəcəli əməkdaşların evdən işləməsini, mağaza və restoranların iş vaxtının məhdudlaşdırılmasını nəzərdə tutur. Həmçinin, Yava adasında ofislərin, məscidlərin, parkların, ticarət mərkəzlərinin tamamilə bağlandığı da qeyd edilir.
İyulun 6-dan başlayaraq, Cakartanın tibbi oksigen üçün qonşu Sinqapura və digər ölkələrə müraciət etdiyi də bildirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
