İndoneziyada daşqınlar və torpaq sürüşmələrindən 80-dən çox insan həlak olub

07.04.2021 [16:41]
Çap et
A⁺ A^-

Tokio, 7 aprel, AZƏRTAC

İndoneziyada və Şərqi Timorda baş verən daşqınlar və torpaq sürüşmələri nəticəsində 86 nəfər həlak olub, 100-dək itkin düşüb, minlərlə təxliyə olunanlar var.

AZƏRTAC yerli KİV-lərə istinadla xəbər verir ki, daşqınlar nəticəsində İndoneziya kəndləri bir-birinin ardınca su altında qalıb. Ölkənin şərqində leysan yağışlar nəticəsində silsilə torpaq sürüşmələri və sellər baş verib. Minlərlə ailə evsiz qalıb.

Palçıq axınları yolları və körpüləri məhv edib. Bu, xilasedicilərin işində problemlər yaradıb. Nəticədə onların zərərçəkənlərə yaxınlaşması çətinləşib.

İndoneziya ilə qonşuluqda yerləşən Şərqi Timorda da təbii fəlakət baş verib. Nəticədə 11 nəfər həlak olub.

Hakimiyyət orqanları həlak olanların ailələrinə 15 milyon İndoneziya rupisi (təqribən 1000 dollar) məbləğində yardım ayırmağı vəd edib. İndoneziya Prezidenti Coko Vidodo da zərərçəkənlərə müraciət ünvanlayıb. Müraciətin mətnində deyilir: “Hər şeydən əvvəl öz adımdan və bütün İndoneziya xalqı adından həlak olanların ailələrinə başsağlığı verirəm. Həmçinin mən bu fəlakətdən zərərçəkən bacı və qardaşlarımızın kədərini başa düşürəm və onların dərdlərinə şərik oluram”.

Bildirilir ki, bu, son 40 ildə İndoneziyada baş vermiş ən böyük fəlakətdir.

Vüqar Ağayev

AZƏRTAC-ın xüsusi müxbiri

Tokio