İnternet və mobil bankçılıq xidmətləri vasitəsilə müştəri köçürmələrinin həcmi artıb
Bakı, 10 mart,AZƏRTAC
Bu ilin əvvəlinə ölkədə fəaliyyət göstərən bütün banklar, o cümlədən “Azərpoçt” MMC tərəfindən internet bankçılıq xidməti, 20 bank və “Azərpoçt” MMC tərəfindən isə mobil bankçılıq xidməti təqdim olunur.
AZƏRTAC xəbər verir ki, bu barədə Azərbaycan Mərkəzi Bankının illik “Rəqəmsal Ödənişlər İcmalı”nda bildirilir.
2024-cü il ərzində bank müştərilərinin cari hesablarından kağız daşıyıcılar və rəqəmsal bankçılıq vasitəsilə aparılan köçürmələrin sayı 694,7 milyon ədəd, həcmi isə 456,8 milyard manat təşkil edib.
Aparılan köçürmələrin say üzrə 93,5 faizi, həcm üzrə isə 77,4 faizi məhz rəqəmsal bankçılıq vasitəsilə reallaşdırılıb. 2024-cü il ərzində internet bankçılıq xidmətləri vasitəsilə aparılan müştəri köçürmələrinin həcmi 2023-cü illə müqayisədə 21 faiz artaraq 274,7 milyard manat, mobil bankçılıq xidmətləri vasitəsilə aparılan müştəri köçürmələrinin həcmi isə 38 faiz artaraq 63,9 milyard manat olub.
Bölmənin digər xəbərləri
