İordaniyalı yazıçı: Azərbaycan əsgərinin qəhrəmanlığı nəticəsində ədalət zəfər çaldı
Qahirə, 9 noyabr, AZƏRTAC
Azərbaycan əsgərinin qəhrəmanlığı nəticəsində ədalət zəfər çaldı, Qafqaz regionunda yaşayan xalqlar üçün sülh və sabitlik dövrü başladı. İordaniyada yaşayan çərkəz mənşəli vətəndaş kimi Azərbaycanın müqəddəs Vətən müharibəsində Qələbəsi məni çox sevindirdi.
Bu sözləri AZƏRTAC-a müsahibəsində iordaniyalı yazıçı, Qafqaz məsələləri üzrə tədqiqatçı Niyazi Kotay söyləyib.
O deyib: “Azərbaycan torpaqlarının işğaldan azad edilməsindən bir il ötür. Mən bu Qələbəni son 100 ildə Qafqazda gedən proseslərin kontekstində dəyərləndirmək istəyirəm. Bir əsr boyu region xalqları, o cümlədən azərbaycanlılar çətin sınaqlardan keçiblər. Lakin Azərbaycan istər XX əsrin əvvəllərində, istərsə də sonlarında təcavüzə və ərazilərinin işğalına məruz qalan ölkə kimi daha mürəkkəb proseslərlə üzləşib. İmperialist güclərin maraqları çərçivəsində Qafqazda baş verən müharibələr və münaqişələr bir neçə etnik qrupun assimilyasiyası və ya yox olması ilə nəticələnib. Amma Qafqazın ən çoxsaylı xalqı - azərbaycanlılar bu çətinlikləri dəf edə biliblər. Onlar Qafqazın XXI əsr tarixində yeni qəhrəmanlıq səhifəsi yazıb və torpaqlarını işğaldan azad etməyə müvəffəq olublar. Ötən ilin 44 günlük müharibəsi, həqiqətən, bir qəhrəmanlıq dastanıdır”.
Niyazi Kotay bildirib ki, Qərb dövlətləri XX əsrin sonunda da azərbaycanlıların başına gətirilən müsibətlərə laqeyd yanaşıblar. Xocalıda və başqa yerlərdə dinc əhalinin dini mənsubiyyətinə görə qətlə yetirilməsinə, kütləvi qırğınlara hələ də lazımi qiymət verilməyib, onların günahkarları layiqli cəzalarını almayıblar. Onu da nəzərə almaq lazımdır ki, Azərbaycan xristianların və müsəlmanların birlikdə azad yaşadığı və öz dinlərinə sərbəst şəkildə ibadət etdikləri dünyəvi bir ölkədir. Azərbaycanlılar həmişə qonşuları ilə sülh və qarşılıqlı anlaşma şəraitində yaşamağa səy göstəriblər. Buna rəğmən, qonşu Ermənistan tərəfindən təcavüzə məruz qalıb, müstəqilliyin ilk illərində əraziləri işğal olunub, kütləvi qırğınların hədəfinə çevrilib. Bu baxımdan, Azərbaycanın Qələbəsi bütün Qafqaz regionu üçün mühümdür. Artıq bu regionda sülh və əmin-amanlıq şəraitində yaşamağın vaxtıdır və bütün problemlər konstruktiv dialoq yolu ilə həll olunmalıdır. Rəsmi Bakı bu məqsədlərə çatmağın yollarını göstərir. Regional əməkdaşlıq, kommunikasiyaların, nəqliyyat dəhlizlərinin açılması, yeni transmilli layihələrin həyata keçirilməsi sülhə və sabitliyə şərait yaradacaq.
“Bir çərkəz mənşəli İordaniya vətəndaşı kimi, Azərbaycan Prezidenti İlham Əliyevi və qardaş azərbaycanlıları şanlı Zəfər münasibətilə təbrik edir, Qafqazda yaşayan bütün xalqlara və etnik qruplara sülh, əmin-amanlıq və rifah arzulayıram”, - deyə Niyazi Kotay əlavə edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
