İQTİSADİ İNKİŞAF NAZİRLİYİ ŞƏKİ-ZAQATALA BÖLGƏSİNİN İŞ ADAMLARI İLƏ GÖRÜŞ KEÇİRMİŞDİR
Tədbirin keçirilməsindən əsas məqsəd Dövlət proqramına uyğun olaraq, bölgədə fəaliyyət göstərən iş adamlarının problemlərinin araşdırılması, kiçik və orta sahibkarlıq subyektlərinin kredit ehtiyaclarının öyrənilməsi, kreditlər üzrə sifarişlərin qəbulu və kreditlərin operativ şəkildə verilməsinə nail olmaqdır.
Müvəkkil kredit təşkilatları nümayəndələrinin görüşdə iştirakı kredit müraciətlərinin qiymətləndirilməsinə və qərarların çevik şəkildə qəbul edilməsinə şərait yaratmışdır.
Rəsmi hissə başlanmazdan əvvəl görüş iştirakçıları Olimpiya İdman Kompleksinin foyesində yerli sahibkarların istehsal etdikləri məhsullardan və sənətkarların əl işlərindən ibarət sərgi ilə yaxından tanış olmuşlar.
Tədbiri giriş sözü ilə açan iqtisadi inkişaf naziri Fərhad Əliyev ölkə iqtisadiyyatının daha da inkişaf etdirilməsi, son illərdə sahibkarlığa dövlət qayğısının artırılması istiqamətində həyata keçirilən tədbirlərdən danışmışdır. Nazir respublika Prezidenti İlham Əliyevin ölkənin regionlarının inkişafına böyük diqqət və qayğı göstərdiyini xüsusi vurğulamış, dövlət başçısının 2004-cü il 11 fevral tarixli Fərmanı ilə təsdiq edilmiş «Azərbaycan Respublikası regionlarının sosial-iqtisadi inkişafı Dövlət Proqramı»nı bunun bariz nümunəsi olduğunu vurğulamışdır.
F.Əliyev tədbirdə iştirak edən sahibkarlara qarşılaşdıqları problemlər və güzəştli kreditlərə tələbatları barədə açıq məlumat vermələrini təklif etmişdir.
Şəki Şəhər İcra Hakimiyyətinin başçısı Əşrəf Məmmədov Dövlət proqramının icrası ilə bağlı rayonda həyata keçirilmiş və nəzərdə tutulan tədbirlərdən, layihələrdən söhbət açmışdır.
Sonra Azərbaycan Banklar Assosiasiyasının sədri Zakir Nuriyev, Sahibkarlığa Kömək Milli Fondunun və müvəkkil kredit təşkilatlarının nümayəndələri, yerli iş adamları çıxış edərək, Şəki-Zaqatala iqtisadi rayonunda sahibkarlığın daha da inkişaf etdirilməsi, bölgənin sosial-iqtisadi inkişafına yönəldilmiş layihələrin həyata keçirilməsinin sürətləndirilməsi, kreditlərin verilməsi mexanizminin və sahibkarların maliyyə mənbələrinə çıxışının sadələşdirilməsi, turizmin gələcək inkişaf perspektivləri, sərmayələrin cəlb edilməsi istiqamətində nəzərdə tutulmuş tədbirlər barədə danışmışlar. Bildirilmişdir ki, sahibkarlığın inkişafı üçün yaradılmış əlverişli sərait, yeni emal müəssisələrinin açılması, fəaliyyətini dayandırmış müəssisələrin yenidən işə salınması və ya istehsalın genişləndirilməsi nəticəsində 2003-cü Ilin 1 oktyabrından ötən dövrdə təkcə Şəki-Zaqatala iqtisadi rayonunda 3500-dən çox yeni iş yeri yaradılmışdır. Sahibkarlığa Kömək Milli Fondunun vəsaiti hesabına müvəkkil kredit təşkilatları vasitəsilə 18 sahibkarlıq subyektinə 3,3 milyard manatlıq güzəştli kredit verilmiş, bunun nəticəsində 400 yeni iş yeri açılmışdır.
Rəsmi hissədən sonra sahibkarlarla kredit təşkilatları arasında geniş fikir mübadiləsi aparılmış, kredit təkliflərinə baxılmış və bunlarla bağlı yerindəcə müvafiq qərarlar qəbul edilmişdir. Müəyyən olunmuşdur ki, kreditləşdirilən layihələrdən 15-i orta və iri həcmlidir və onların maliyyələşdirilməsi üçün 5 milyard manata yaxın vəsait ayrılacaqdır. O cümlədən Zaqatala rayonu üzrə 5 layihəyə, Şəki və Qax rayonlarının hər biri üzrə 4 layihəyə, Balakən və Qəbələ rayonları üzrə bir layihəyə kreditin ayrılması barədə qərar qəbul edilmişdir. Həmin layihələrin reallaşması 550 yeni iş yerinin açılmasına imkan verəcəkdir. Mikro və kiçik həcmli kreditlərin sayı isə 200-ə yaxın olmuşdur. Ümumi məbləği 5 milyard manat olan bu kreditlərin səmərəli istifadəsi nəticəsində isə 500-dən çox yeni iş yeri yaradılacaqdır.
Görüş işgüzar və qarşılıqlı anlaşma şəraitində başa çatmışdır.
Bölmənin digər xəbərləri
