İranın “Daniznews” saytı AzərTAc-ın erməni saxtakarlığını ifşa etməsi ilə bağlı xəbər yayıb

10.01.2015 [23:01]
Çap et
A⁺ A^-

Tehran, 10 yanvar, AZƏRTAC

İran İslam Respublikasının “Daniznews” saytı AZƏRTAC-ın növbəti erməni saxtakarlığını üzə çıxarması ilə bağlı xəbər yayıb.

AZƏRTAC-ın bununla əlaqədar yaydığı materiala istinad edən sayt bildirir ki, İraq Ali İslam Şurasının rəsmi mətbu orqanı olan “əl-İstiqamə” qəzetində dərc olunmuş məqalədə 20 Yanvar faciəsində öldürülmüş azərbaycanlıların fotoşəkli guya bir əsr bundan əvvəl törədilmiş “erməni soyqırımı” qurbanları kimi təqdim edilib.

Eyni fotoşəkil, həmçinin uydurma “erməni genosidi”nin yüz illiyinin qeyd edilməsi üçün yaradılmış təşkilatın Qahirə komitəsinin Facebook səhifəsində də yerləşdirilib. Qeyd edək ki, bu fotoşəkil 1990-cı il yanvarın 20-də AZƏRTAC-ın fotomüxbiri tərəfindən çəkilib və onun originalı agentliyin arxivində saxlanılır.

Əslində, “genosidi” bu cür saxta “dəlil-sübutla” əsaslandıran ermənilər fərqinə varmadan onu inkar etmiş olurlar. Təsəvvür edin, mediada bir hadisənin yüzilliyindən bəhs edir və həmin məqalədə Azərbaycan xalqının tarixinə 25 il əvvəl qanla yazılmış 20 Yanvar faciəsini əks etdirən fotonu yerləşdirirlər. Bundan daha böyük saxtakarlıq nə ola bilər?

Rabil Kətanov

AZƏRTAC-ın xüsusi müxbiri

Tehran