İsmayıl İman: Karmen teatra təkrar-təkrar qayıdan taleyüklü qadın arxetipidir
Bakı, 24 yanvar, Günel Alıyeva, AZƏRTAC
Xose fiquruna diqqətin cəmlənməsi ideyası tamaşanın quruluşçu rejissoru Tural Mustafayevə məxsusdur. Bu yanaşma məşhur süjeti yeni prizmadan oxumağa, “Karmen” hekayəsini kişi obrazı olan Xosenin gözü ilə, onun daxili səsi, yaddaşı və yaşadıqlarını dəfələrlə “yenidən danışmaq” üsulu vasitəsilə təqdim etməyə imkan verir.
Bunu AZƏRTAC-ın müxbiri ilə söhbətində “Karmen. Xosenin hekayəsi” tamaşasının ssenari müəllifi, dramaturq və teatr kuratoru İsmayıl İman söyləyib.
Onun sözlərinə görə, bu cür yanaşma müəyyən mənada ilkin mənbə olan Prosper Merimenin novellasında da mövcuddur, çünki məhz Xose hekayənin nəql edən personajı və bələdçisidir.
Bununla yanaşı, o vurğulayıb ki, yanaşmaların dəyişdirilməsinə baxmayaraq, tamaşa Karmensiz mümkün deyil.
“Bu fiqur adi personaj deyil, hekayənin məna mərkəzidir. Onsuz nə konflikt, nə də süjetin faciəvi inkişafı mümkündür. Karmen azadlığı və xarakteri ilə yanında olan kişilərə dağıdıcı təsir göstərən taleyüklü qadının klassik obrazıdır. Bu, teatrın təkrar və təkrar qayıtdığı arxetipik, əbədi motivdir”, – deyə İ. İman qeyd edib.
Ssenarist əlavə edib ki, məhz buna görə Karmen obrazına yenidən müraciət etmək istəyi yaranır, lakin onu bu dəfə kənardan deyil, Xosenin qavrayışı, yəni onun sevgisi və ağrısı, qısqanclığı, seçimi və intiqam almaq prizmasından görmək məqsədi qoyulur.
Bölmənin digər xəbərləri
