İSPANİYA KOMANDASI FUTBOL ÜZRƏ 13-CÜ AVROPA ÇEMPİONU OLDU
AZƏRTAC-ın xüsusi müxbiri xəbər verir ki, iyunun 29-da Vyanada “Ernst Happel” stadionunda futbol üzrə 13-cü Avropa çempionatının final oyunu keçirilmişdir. Final oyununda üçqat Avropa çempionu Almaniya və bu titula cəmi bir dəfə (1964) yiyələnmiş İspaniya yığma komandaları qarşılaşmışlar.
Oyunun ilk dəqiqələri alman futbolçularının hücumları ilə yadda qalsa da, çempionatın əsas favoriti sayılan İspaniya yığması qısa zamanda bütün cinahlarda təşəbbüsü ələ ala bilmişdir. Oyunun 33-cü dəqiqəsində alman müdafiəçisi Filip Lamın səhvindən istifadə edən “el ninyo” (uşaq) ləqəbli ispan hücumçusu Fernando Torres sərrast zərbə ilə hesabı açmışdır.
Almaniya yığması oyunun ikinci hissəsində də ispanların müdafiəsini yarmağa çalışsa da, buna müvaffəq ola bilməmişdir. İspanların “tiki-taka” adlandırdığı, dəqiq və qısa öturmələrdən ibarət oyun sistemi qarşısında kapitan Mixael Ballakın başçılıq etdiyi Almaniya millisi aciz qalmışdır. İspaniya millisinin Almaniya yığması üzərində üstünlüyü ilə keçən ikinci hissədə hesab dəyişməmişdir: 1:0.
Beləliklə, 2008-ci il Avropa birinciliyinin ən qocaman iştirakçısı, 70 yaşlı baş məşqçi Luis Araqonesin yetirmələri 44 illik fasilədən sonra İspaniyaya ikinci dəfə Avropa çempionu titulunu qazandırmışlar.
Bölmənin digər xəbərləri
