İspaniya polisi Joan Mironun itmiş əsərini Londondakı hərracda aşkarlayıb
Bakı, 7 sentyabr, AZƏRTAC
İspaniya polisi Joan Mironun daşınma zamanı itən rəsm əsərini Londondakı hərracda aşkarlayıb.
AZƏRTAC xarici KİV-lərə istinadla xəbər verir ki, Böyük Britaniyanın hakimiyyət orqanları rəsmin satışdan çıxarılmasını və ispaniyalı sahibinə qaytarılmasını tələb edib.
Bir müddət öncə ispaniyalı kolleksiyaçının London sakininə satdığı rəsm əsərinin göndərilmə zamanı itdiyi barədə məlumat yayılmışdı.
Hadisə ilə bağlı təhqiqat iyul ayında, kataloniyalı rəssamın “Qaudi” seriyasından olan əsərinin itməsi barədə nəqliyyat kompaniyasına müraciətdən sonra başlayıb. Hüquq-mühafizə orqanlarının əməkdaşları sənət əsərinin başqa ünvana çatdırıldığını müəyyən edib. Lakin həmin şəxs rəsmi İspaniyaya geri göndərdiyini bildirib. Nəhayət, rəsm əsəri London hərracında aşkarlanıb. Onun təxmini dəyəri 10 min avro həcmində qiymətləndirilir.
İspaniya polisinin məlumatına görə, əsər artıq sahibinə qaytarılıb.
Bölmənin digər xəbərləri
