İSTANBULUN TOPQAPI SARAYI “MUZEY ADASI”NA ÇEVRİLƏCƏKDİR
AZƏRTAC-ın xüsusi müxbiri xəbər verir ki, İstanbulun məşhur Topqapı sarayından iyun ayında oğurlanmış tarixi incəsənət əsərləri Hüsam Bəy məscidində tapıldıqdan sonra Türkiyənin ziyalıları mədəni irsin qorunması ilə bağlı təkliflər irəli sürmüşlər. Bir neçə ay baxımsız qalan bu əsərlər arasında türk sultanları I Mahmud və I Əbdülhəmidin portretləri, müqəddəs Quranın surələri yazılmış qumaş parçalar və digər incəsənət inciləri vardır. Onlar bərpa olunduqdan sonra Türkiyənin mədəniyyət naziri Atilla Koçun təşəbbüsü ilə yaradılacaq və 10 muzeydən ibarət olacaq “muzey adası”nda nümayiş etdiriləcəkdir. Professor İlber Ortaylının tərtib etdiyi plana görə, muzey kompleksi yaxınlıqdakı dəmiryolu stansiyası, Gülhanə parkı, Alay Köşkünü də əhatə edəcəkdir. Atilla Koç ordunun istifadəsində olan binaların da muzey kompleksinə verilməsi üçün yaxın günlərdə baş komandanlıqla danışıqlar aparacaqdır.
Bundan başqa, Topqapı sarayının zirzəmisində olan mindən çox tarixi əsər də bərpa edildikdən sonra bu binalarda sərgilənməyə başlanacaqdır. Sarayın hazırda xarabalığa çevrilmiş 50 anbarı və üçdə biri bağlı olan Hərəmxana da bərpa ediləcəkdir.
Bölmənin digər xəbərləri
