Roma, 10 noyabr, AZƏRTAC

Zəfər Gününün İtaliyada qeyd edilməsi çərçivəsində İtaliya Respublikası Deputatlar Palatasının binasında - Montesitorio sarayında tədbir keçirilib.

AZƏRTAC xəbər verir ki, tədbirdə İtaliya Deputatlar Palatasının sədr müavini Ettore Rosato, İtaliya parlamentində İtaliya-Azərbaycan parlamentlərarası Dostluq Assosiasiyasının sədri deputat Rossana Boldi, İtaliya parlamentində Parlamentlərarası İttifaq yanında İtaliya-Azərbaycan parlamentlərarası dostluq qrupunun sədri senator Stefano Luçidi, Milli Məclisin Azərbaycan-İtaliya parlamentlərarası əlaqələr üzrə işçi qrupunun sədri, deputat Azər Kərimli çıxış ediblər.

Vətən müharibəsinin başa çatması və Azərbaycan ərazilərinin işğaldan azad olunmasından ötən bir il ərzində həmin ərazilərdə həyata keçirilən geniş bərpa və yenidənqurma prosesi, bu qısa dövrdə qazanılan yüksək nəticələr, işğal vaxtı həmin torpaqlara yerləşdirilmiş çoxsaylı minaların səbəb olduğu ağır humanitar vəziyyət, Azərbaycan-İtaliya strateji tərəfdaşlığının daha da gücləndirilməsi istiqamətində atılan addımlar, azad olunmuş ərazilərdə aparılan bərpa və yenidənqurma layihələrinə italyan şirkətlərinin cəlbi kimi mövzular tədbirin əsas müzakirə mövzuları olub.

İtaliya Deputatlar Palatasının sədr müavini E.Rosato Vətən müharibəsindən dərhal sonra İtaliya parlamentində təmsil olunan aparıcı partiyaların üzvlərindən ibarət senator və deputatların daxil olduğu nümayəndə heyətinin rəhbəri kimi Azərbaycana səfəri ilə bağlı xatirələrini bölüşüb, səfərin işğal vaxtı həmin torpaqlarda sistematik olaraq həyata keçirilmiş dağıntıların, ərazilərin viran edilməsinin şahidi olduqlarını bildirib, səfərin məsələ ilə bağlı həqiqətlərin İtaliya ictimaiyyətinə çatdırılmasındakı önəmini vurğulayıb. Ölkələrimizin bir-birinə dərin bağlarla bağladığını, Azərbaycanın İtaliya üçün vacib tərəfdaş olduğunu deyən E.Rosato iki ölkə arasında tərəfdaşlığın daha da gücləndirilməsi və Azərbaycanın haqq səsinin hər zaman dünyaya çatdırılmasına dəstək verməyə hazır olduğunu bildirib.

İtaliya parlamentində İtaliya-Azərbaycan parlamentlərarası dostluq assosiasiyasının sədri deputat R.Boldi və İtaliya-Azərbaycan parlamentlərarası dostluq qrupunun sədri senator S.Luçidi ölkəmizin dostu olan çoxsaylı italyan parlamentarilər tərəfindən Vətən müharibəsi günlərində və ondan sonra keçmiş Qarabağ münaqişəsi, bölgədəki vəziyyət barədə İtaliya siyasi dairələrində və ictimaiyyətində düzgün fikrin formalaşdırılması istiqamətində aparılan işlər barədə danışıb, münaqişənin bitməsini və bölgədə davamlı sülhün bərqərar olması istiqamətində Azərbaycanın atdığı mühüm addımları, habelə ölkəmizin zəngin multikultural ənənələrini təqdir ediblər. Bölgədə vəziyyətin sabitləşməsinin Azərbaycan-İtaliya strateji tərəfdaşlığının gücləndirilməsi və şaxələndirilməsi üçün də geniş perspektivlər açdığını bildirən parlamentarilər bunun italyan şirkətlərinin işğaldan azad olunmuş ərazilərdəki bərpa və yenidənqurma işlərinə cəlb olunmasından tutmuş, iqtisadiyyatın müxtəlif sektorlarında, habelə mədəniyyət, humanitar, təhsil, elm və texnologiya sahələrində yeni əməkdaşlıq imkanları yaratması barədə danışıblar. Bu mövzulara oktyabrın 18-də Azərbaycanın dövlət müstəqilliyinin bərpasının 30 illiyi münasibətilə İtaliya Senatında keçirilmiş mətbuat konfransında da geniş toxunulduğunu qeyd ediblər.

Tədbirdə çıxış edən Milli Məclisdə Azərbaycan-İtaliya parlamentlərarası əlaqələr üzrə işçi qrupunun sədri, deputat A.Kərimli İtaliyaya bu səfərinin Zəfər Günü münasibətilə Romada keçirilən tədbirlərdə iştirak etməklə bağlı olduğunu bildirib. İşğal illərində, Vətən müharibəsi günlərində və ondan sonra çoxsaylı italyan parlamentari tərəfindən Azərbaycanın haqlı mövqeyinə verilmiş dəstək bəyanatlarını, müharibənin başa çatmasından sonra Deputatlar Palatasının sədr müavini Ettore Rosato və Senatın Xarici əlaqələr daimi komissiyasının sədri Vito Petroçellinin rəhbərliyi ilə iki nümayəndə heyətinin Azərbaycanın işğaldan azad edilmiş ərazilərinə, Vətən müharibəsi zamanı Ermənistanın ağır artilleriyasının əsas hədəflərindən biri olmuş, çoxsaylı azərbaycanlı mülki şəxsin qətlə yetirildiyi Gəncə şəhərini ziyarət etmələrinin və həmin ərazilərdən, eləcə də İtaliyaya qayıtdıqdan sonra verdikləri bəyanatların Azərbaycan xalqı tərəfindən yüksək qiymətləndirildiyini bildirib. A.Kərimli bu günlərdə də İtaliyanın çoxsaylı parlamentarilərinin Zəfər Günü və Azərbaycanın ərazi bütövlüyünün bərpası münasibətilə çoxsaylı təbrik məktubları göndərdiklərini vurğulayıb və buna görə təşəkkürünü bildirib. Azərbaycan-İtaliya strateji tərəfdaşlığının daha da gücləndirilməsi üçün geniş imkanların mövcudluğundan, işğal olunmuş ərazilərdəki bərpa və yenidənqurma işlərinə italyan şirkətlərinin cəlbi istiqamətdə işin davam etdirilməsindən danışıb.

Sonra A.Kərimli ilə İtaliya Senatının insan hüquqlarının müdafiəsi və təşviqi üzrə fövqəladə komissiyasının sədri, senator Corcio Fede arasında görüş keçirilib. Görüşdə həm Birinci, həm də İkinci Qarabağ müharibəsi zamanı Ermənistanın insan haqlarını kobud şəkildə pozduğu, 30 ilə yaxın müddətdə Azərbaycanın beynəlxalq səviyyədə tanınmış ərazilərinin 20 faizini hərbi işğal altında saxladığı, istər Ermənistan ərazisində, istərsə də işğal olunmuş torpaqlardakı bütün azərbaycanlılara qarşı etnik təmizləmə həyata keçirdiyi, 1 milyondan çox azərbaycanlını öz yurd-yuvasından didərgin saldığı, insanlığa qarşı çoxsaylı müharibə cinayətləri törətdiyi bildirilib. Bu xüsusda, Ermənistan tərəfindən Xocalı soyqırımının törədilməsi, Vətən müharibəsi günlərində döyüş bölgələrindən çox uzaq məsafədə yerləşən Azərbaycan ərazilərində mülki əhalinin ballistik raketlərlə hədəfə alınması, onlara qarşı fosforlu bombalardan istifadə edilməsindən və bunun səbəb olduğu ağır nəticələrdən və çoxsaylı insan tələfatlarından danışılıb. 30 illik işğal dövründə Ermənistanın ərazilərimizi viran qoyduğu, həmin əraziləri yerlə-yeksan etdiyi, Azərbaycanın tarixi-mədəni irsinə qarşı soyqırımı, təbiətə qarşı ekoloji terror həyata keçirdiyi, həmin əraziləri dünyanın ən çox minalanmış ərazilərindən birinə çevirdiyi və mina partlayışlarının çoxsaylı mülki azərbaycanlıların qətlinə və ağır yaralanmasına səbəb olduğu diqqətə çatdırılıb. Ermənistan tərəfinin minalanmış ərazilərin düzgün xəritələrinin Azərbaycana verməkdən imtina edərək beynəlxalq hüquq normalarını pozmağa davam etdiyi vurğulanıb.

Ətraflı məlumat üçün təşəkkürünü bildirən senator C.Fede uzun illər ərzində torpaqlarından məhrum olunmuş azərbaycanlıların yaşadıqları çətinliklərə görə təəssüf hissini ifadə edib, Azərbaycanın ərazi bütövlüyünün bərpasının həmin şəxslərin öz evlərinə qayıtması, ümumilikdə bölgədə uzunmüddətli sülhün təmin edilməsinə böyük töhfə verəcəyini arzuladığını bildirib.

Nihad Budaqov

AZƏRTAC-ın xüsusi müxbiri

Roma