İtaliyadakı regional seçkilərdə sağ mərkəzçi koalisiyanın namizədləri qalib gəliblər
Roma, 14 fevral, AZƏRTAC
İtaliyanın Latsio və Lombardiya regionlarında yerli rəhbərlərin və şura üzvlərinin müəyyən olunduğu seçkilərdə sağ mərkəzçi koalisiyanın namizədləri qalib gəliblər.
AZƏRTAC xəbər verir ki, fevralın 12-13-də keçirilən seçkilər paytaxt Romanın da yerləşdiyi Latsio regionunda 378, Lombardiya regionunda 1504 bələdiyyəni əhatə edib. Seçkilərdə seçici fəallığı ümumilikdə 40 faiz, o cümlədən Latsio regionunda 37,2 faiz, Lombardiyada 41,6 faiz təşkil edib.
İlkin nəticələrə görə, Latsio regionunda sağ mərkəzçi koalisiyanın namizədi Françesko Rossa səslərin 53 faizdən çoxunu toplayaraq qalib gəlib. Sağ mərkəzçi koalisiyanın namizədi Attilio Fontana isə 54 faizdən çox səs yığaraq Lombardiya regionunda qalib olub.
İtaliyanın Baş naziri Ciorcia Meloni seçkilərin nəticələrini şərh edərkən deyib: “Françesko Rossa və Attilio Fontananı regional seçkilərdəki qələbələri münasibətilə təbrik edirik. Əminik ki, hər ikisi Latsio və Lombardiya sakinlərindən alınan səsə və mandata layiq olmaq üçün əllərindən gələni edəcəklər. Bu, sağ mərkəzçiləri birləşdirən və hökumətin işini gücləndirən mühüm nəticədir”.
Qeyd edək ki, Latsio regional şurası rəhbər və 50, Lombardiya isə regional şura rəhbəri də daxil olmaqla 80 üzvdən ibarətdir. Bu regionlardakı seçkilər ümumilikdə 12 milyondan çox insanı əhatə edib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
