Kadıköydə qatar stansiyasında arxeoloji qazıntılar zamanı əhəmiyyətli tarixi əsərlər aşkarlanıb

15.12.2020 [18:46]
Çap et
A⁺ A^-

İstanbul, 15 dekabr, AZƏRTAC

İstanbulun Kadıköy rayonunda yerləşən Haydarpaşa qatar stansiyasında əhəmiyyətli tarixi əsərlər aşkarlanıb.

AZƏRTAC xəbər verir ki, bu tarixi əsərlər 2018-ci ildən etibarən davam edən arxeoloji qazıntıların aparıldığı bölgədə tapılıb. İstanbulun, xüsusilə Kadıköy rayonunun tarixinin öyrənilməsində böyük əhəmiyyət kəsb edəcək bu əsərlər qatar stansiyasının platforma hissəsinin altında aşkarlanıb. Stansiyanın böyük sahəsini əhatə edən tapıntılar arasında kütləvi məzarlığın da olduğu bildirilir.

Arxeoloqlar indiyədək bənzəri görülməyən bu tapıntının kilsəyə oxşamadığını, lakin buranın vaxtilə müqəddəs və dini məqsədlər üçün istifadə olunduğunu ehtimal edirlər. Bildirilib ki, tikilinin əsas hissəsini mərmər bloklardan ibarət döşəmə təşkil edir. Mərmərin altında isə bir məzar otağı və ətrafında kütləvi məzarlıqlar yerləşir. Tapıntılar arasında miladdan əvvəl VII əsrə aid 18 minə yaxın sikkənin olduğu da bildirilir.

Qazıntılar zamanı XII əsrə aid bəzi əsərlər də aşkar edilib.

Günel Məlikova

AZƏRTAC-ın xüsusi müxbiri

İstanbul