Komitə sədri: Bələdiyyələr risk altında olan həssas ailələrin monitorinqini apara bilərlər
Bakı, 23 aprel, AZƏRTAC
Ailə cəmiyyətin təməl daşıdır. Bizim milli və mənəvi dəyərlərimizin daşıyıcısıdır. Cəmiyyətin sağlamlığının göstəricisi, gələcək nəsillərin formalaşdığı əsas sosial vahiddir. Lakin sürətlə dəyişən müasir dövrün çağırışları – urbanizasiya, sosial təcrid, iqtisadi çətinliklər, dəyərlər böhranı və informasiya təzyiqləri ailənin sabitliyinə və funksionallığına birbaşa təsir edir. Bu dəyişikliklər ailə modelinin özündə, münasibətlərdə və sosial dəstək ehtiyaclarında da özünü göstərir. Belə bir şəraitdə ailələrin yalnız mərkəzi deyil, yerli səviyyədə də sistemli şəkildə, onların yaşadığı icmalarda dəstəklənməsi aktuallıq kəsb edir.
AZƏRTAC xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova “Ailə və icma məsələlərində yerli özünüidarəetmənin təsir mexanizmləri” adlı konfransda çıxış edərkən deyib.
Komitə sədri bu məsələdə bələdiyyələrin rolunun ön plana çıxdığını qeyd edərək bildirib ki, bələdiyyələr ailəyə ən yaxın idarəetmə strukturudur: "Bələdiyyələr ailələrin gündəlik ehtiyaclarını, sosial-iqtisadi vəziyyətini, yerli resursları və ictimai dinamikanı birbaşa müşahidə və idarə edə biləcək unikal imkanlara malikdir. Bələdiyyələr insanların, ailələrin, müxtəlif sosial qrupların həyatında mühüm rol oynaya bilər. 2023-cü ildə Dövlət Komitəsinin tövsiyəsi ilə bütün bələdiyyələrdə gender komissiyaları yaradılıb. "Ailə Akademiyası” adlı layihə 2017-2018-ci illərdə bələdiyyə orqanları ilə birgə həyata keçirilib. Layihə çərçivəsində 30 rayon və şəhərdə görüşlər və təlimlər olub. Bələdiyyələrin fəaliyyəti ilə bağlı mövcud qanunvericilikdə də dəyişikliklər edilib. Onlar iqtisadi imkanlarını formalaşdırmaq üçün vasitələr əldə ediblər. Bələdiyyələr gənc ailələrin dəstəklənməsi məsələsinə kömək edə bilərlər. Həmçinin risk altında olan həssas ailələrin monitorinqini apara, bunun səbəblərini araşdıra bilərlər".
B.Muradova qeyd edib ki, Dövlət İdarəçilik Akademiyası ölkədə dövlət və bələdiyyə idarəetməsi sahəsində ixtisaslaşmış ali təhsil müəssisələrindən biridir. "Akademiyada bu sahə üzrə bakalavr və magistr proqramları, dövlət və bələdiyyə qulluqçuları üçün ixtisasartırma kursları və ikinci təhsil imkanları mövcuddur. Akademiyanın elm-tədris potensialı, nəzəri-praktik bazası və formalaşdırdığı kadr ehtiyatı ailəyönümlü sosial təşəbbüslərin reallaşdırılması üçün olduqca mühüm intellektual imkanlar yaradır. Bələdiyyələr Assosiasiyasının yerli idarəetmədə koordinasiya imkanları birləşdirilərək çoxşaxəli və effektli fəaliyyət sahəsi yaradıla bilər. Bu baxımdan bu gün təsdiqlənəcək Əməkdaşlıq Protokolu, bu prosesə dəstək verəcək aktorların iştirakı ilə sosial cəhətdən daha dayanıqlı və güclü cəmiyyətin qurulmasına doğru atılmış növbəti praktik addım deməkdir. Əminəm ki, bu əməkdaşlıq sayəsində hazırlanacaq ailəyönümlü yeni bələdiyyə mexanizmləri icmalarda real təsir göstərəcək", -deyə Komitə sədri vurğulayıb.
Bölmənin digər xəbərləri
