KOMPYUTER OYUNLARI ÜZRƏ ÜÇÜNCÜ RESPUBLİKA ÇEMPİONATINA YEKUN VURULMUŞDUR
AZƏRTAC xəbər verir ki, iyunun 20-də Bakı Əyləncə Mərkəzində Gənclər və İdman Nazirliyi ilə Kompyuter Oyunları Milli Assosiasiyasının kompyuter oyunları üzrə birgə təşkil etdikləri üçüncü respublika çempionatına yekun vurulmuşdur.
İştirakçılara uğurlar arzulayan gənclər və idman nazirinin müavini İntiqam Babayev vurğulamışdır ki, yarışın qalibləri noyabrın 5-dən 9-dək Almaniyada keçiriləcək kompyuter oyunları üzrə dünya çempionatında Azərbaycanı təmsil edəcəklər.
Kompyuter Oyunları Milli Assosiasiyasının prezidenti Ramil Əliyev bildirmişdir ki, 7 oyun üzrə keçirilən çempionatda yaşı 15-dən 26-dək olan gənclər iştirak etmişlər. 4 oyun üzrə birinci yeri tutanlar dünya çempionatında iştirak edəcəklər.
Hər bir oyun növü üzrə ilk üç yeri tutmuş iştirakçılar Gənclər və İdman Nazirliyi tərəfindən təsis edilmiş medal, diplom və digər qiymətli hədiyyələr qazanmaqla bərabər, sponsorlar tərəfindən də mükafatlandırılmışlar.
Xatırladaq ki, yarışda 200-dən artıq gənc iştirak etmişdir.
Bölmənin digər xəbərləri
