Konstitusiyanın qəbul olunmasının 19-cu ildönümü Polis Akademiyasında qeyd edilib
Noyabrın 7-də Daxili İşlər Nazirliyinin (DİN) Polis Akademiyasında “İnsan və vətəndaş hüquqlarının və azadlıqlarının konstitusiya təminatının aktual problemləri” mövzusunda beynəlxalq elmi-praktiki konfrans keçirilib.
DİN-in mətbuat xidmətindən AZƏRTAC-a bildiriblər ki, Ombudsman Aparatı, Konstitusiya Məhkəməsi, Azərbaycan Hüquqşünaslar Konfederasiyası, Azərbaycan Milli Elmlər Akademiyasının İnsan Hüquqları və Fəlsəfə, Hüquq institutları, eləcə də Polis Akademiyasının təşkilatçılığı ilə keçirilən konfrans müstəqil Azərbaycanın ilk Konstitusiyasının qəbul olunmasının 19-cu ildönümünə həsr edilib.
Tədbir iştirakçıları əvvəlcə ümummilli lider Heydər Əliyevin xatirəsini dərin ehtiramla yad edib, Polis Akademiyasının həyətində ucaldılan abidəsini önünə əklil qoyublar.
Konstitusiya ilə bağlı filmin nümayişindən sonra konfransı açan Polis Akademiyasının rəisi, polis general-mayoru Nazim Əliyev bildirib ki, Azərbaycanın müstəqilliyinin bərpasından sonra demokratik inkişaf istiqamətində müəyyən addımlar atılsa da, xalqın milli mənəvi dəyərlər sistemindən qaynaqlanan bu ali prinsiplər yalnız ulu öndər Heydər Əliyevin hakimiyyətə qayıdışı ilə həqiqi mahiyyət kəsb etməyə başlayıb.
N.Əliyev demokratik dövlət quruculuğu sahəsində xalqımızın əldə etdiyi ən mühüm nailiyyətlərdən biri kimi 1995-ci il noyabrın 12-də müstəqil Azərbaycanın ilk Konstitusiyasının qəbul edilməsini göstərib. O, Əsas Qanun səviyyəsində təsbit edilən insan və vətəndaş hüquq və azadlıqlarının təmini sahəsində polisin vəzifələrinin, bu sahədə beynəlxalq aktların mükəmməl öyrənilməsi məqsədilə Polis Akademiyasında “Konstitusiya hüququ” və “Daxili işlər orqanlarının fəaliyyətində insan hüquqlarının təminatı” fənlərinin tədris olunduğunu diqqətə çatdırıb.
Konstitusiya Məhkəməsinin sədri Fərhad Abdullayev çıxışında bildirib ki, ümummilli lider Heydər Əliyevin rəhbərliyi ilə hazırlanaraq ümumxalq səsverməsi yolu ilə qəbul edilən Konstitusiya ölkəmizdə hüquqi dövlət və vətəndaş cəmiyyətinin yaradılmasına və formalaşmasına geniş imkanlar açıb. Bu sənədin ən böyük bölməsi insan hüquq və azadlıqlarına həsr olunub. İnsan hüquq və azadlıqları dövlətin ali məqsədi, onların həyata keçirilməsinin təmin edilməsi isə dövlətin əsas vəzifəsi kimi müəyyən olunub.
AMEA-nın İnsan Hüquqları İnstitutunun direktoru, Milli Məclisin deputatı Aytən Mustafayeva vurğulayıb ki, ölkəmiz əsas insan hüquq və azadlıqlarının qorunmasına təminat kimi demokratik idarəetmə və vətəndaş cəmiyyətinin inkişaf etdirilməsini alternativsiz yol kimi seçib. Qeyd olunub ki, respublikamızda qanunun aliliyi, insan hüquqları və sosial ədalət kimi fundamental əsasların möhkəmləndirilməsi Azərbaycan Prezidenti İlham Əliyevin daim diqqət mərkəzindədir.
BMT-nin Azərbaycandakı nümayəndəliyinin rezident əlaqələndiricisi Antonius Bruk ölkəmizdə demokratik, hüquqi dövlət və vətəndaş cəmiyyətinin formalaşmasına, insan hüquq və azadlıqlarının səmərəli müdafiəsinə yönəlmiş tədbirlər nəticəsində mühüm uğurların əldə olunduğunu qeyd edib. O, insan və vətəndaş hüquqlarının təmin edilməsində polisin rolunun genişləndirilməsini yüksək qiymətləndirib.
Milli Məclisin insan hüquqları komitəsinin sədri Rəbiyyət Aslanova da ölkəmizdə insan hüquqlarının qorunması sahəsində əldə olunan uğurlardan danışıb.
Çıxışlarda xüsusi vurğulanıb ki, ümummilli lider Heydər Əliyevin rəhbərliyi ilə başlanan demokratik hüquqi islahatlar kursu hazırda Prezident İlham Əliyevin uğurla həyata keçirdiyi siyasət nəticəsində yeni mərhələyə qədəm qoyub.
Tədbirdə Polis Akademiyasının “Dövlət və hüquq nəzəriyyəsi” kafedrasının rəisi, polis polkovniki, Əməkdar Müəllim Ceyhun Süleymanovun “Konstitusiya hüququ” adlı dərs vəsaitinin təqdimatı olub.
Sonda Akademiyanın müdavimləri arasında keçirilən intellektual yarışın qalibləri mükafatlandırılıb.
Bölmənin digər xəbərləri
