ELM VƏ TƏHSİL
Kosmik hava durumu və proqnozu açıqlanıb
![](/files/galleryphoto/2023/2/1200x630/16883820903803539284_1200x630.jpg)
![](/files/galleryphoto/2023/2/1200x630/16883820916481732735_1200x630.jpg)
![](/files/galleryphoto/2023/2/1200x630/1688382091286269566_1200x630.jpg)
Bakı, 3 iyul, AZƏRTAC
Hazırda Günəşin səthində 7 ləkə qrupu və 126 ləkə müşahidə olunur.
Bu barədə AZƏRTAC-a N.Tusi adına Şamaxı Astrofizika Rəsədxanasından məlumat verilib. Bildirilib ki, hesabat dövrü ərzində Günəş fəallığı nəticəsində II və IV tip radioemissiya, iyunun 29-da II dərəcəli qismən Yerə istiqamətlənmiş Tac Kütlə Atılmaları qeydə alınıb. Geomaqnit sahəsi sakit və qeyri-stabil səviyyələrdə olub, iyunun 25-də qısa müddətdə zəif geomaqnit qasırğası baş verib. Hazırda geomaqnit sahəsi sakitdir.
İyulun 3-dən 9-dək C sinif alışmanın başvermə ehtimalı 99 faiz, M (R1-R2) sinif alışmanın başvermə ehtimalı 55 faiz, X (R3) sinif isə 10 faiz təşkil edir. 2 MeV-dən çox enerjili elektron selinin sakit və orta səviyyədə olacağı, enerjisi 10 MeV-dən çox olan proton selinin isə 3354 oblastındakı fəallıqla əlaqədar olaraq S1 səviyyəsinə qalxacağı ehtimal olunur.
Günəş küləyinin sürətinə, həmçinin geomaqnit sahəsinə iyulun 4-5-də mənfi qütblü CH HSS-nin (Coronal Hole High Speed Streams) zəif təsiri gözlənilir.