Kreml: Münasibətlərin bərpası yolunun əvvəlində Moskvanın Vaşinqtondan böyük gözləntiləri olmayıb
Moskva, 14 aprel, AZƏRTAC
Moskva və Vaşinqton ikitərəfli münasibətlərin normallaşması yolunun hələ başlanğıcındadır, ona görə də Rusiyanın Amerika tərəfinin hərəkətləri ilə bağlı yüksək gözləntiləri olmayıb.
AZƏRTAC xəbər verir ki, bu barədə Rusiya Prezidentinin mətbuat katibi Dmitri Peskov brifinqdə ABŞ Prezidenti Donald Trampın sələfi Co Baydenin bundan əvvəl Rusiyaya qarşı tətbiq etdiyi sanksiyalarının müddətinin uzadılması barədə qərarını şərh edərkən jurnalistlərə deyib.
Kreml nümayəndəsinin sözlərinə görə, sanksiyalar paketinin uzadılması proqnozlaşdırıla bilən və faktiki olaraq avtomatik addım oldu. Söhbət 2021-ci ilin aprelində Co Baydenin prezidentliyi dövründə verilən və ABŞ tərəfinin milli təhlükəsizliyinə təhdid hesab etdiyi kiberhücumlarda, seçkilərə müdaxilədə və digər hərəkətlərdə iştirak edən şəxslərə aid olan fərmandan gedir.
D.Peskov qeyd edib ki, Rusiya və ABŞ prezidentləri xüsusi nümayəndələr vasitəsilə səmərəli informasiya mübadiləsi qurublar. Onun sözlərinə görə, bu cür təmaslar son dərəcə faydalıdır, çünki onlar bürokratik maneələri keçərək əsas məsələlər üzrə tərəflərə öz mövqelərini birbaşa bildirməyə imkan verir.
O, həmçinin bildirib ki, ABŞ Prezidentinin xüsusi nümayəndəsi Stiven Uitkoffun Sankt-Peterburqa sonuncu səfəri zamanı Vladimir Putinlə Donald Tramp arasında mümkün görüş ətraflı müzakirə olunmayıb. Onun sözlərinə görə, istənilən yüksəksəviyyəli görüşlər ciddi hazırlıq tələb edir.
Kreml nümayəndəsi vurğulayıb ki, Moskva ilə Vaşinqton arasında dialoqun davam edən bərpasına baxmayaraq, müzakirə olunan mövzular son dərəcə mürəkkəb olaraq qalır. Bununla bağlı belə danışıqlardan dərhal nəticə gözləmək düzgün olmazdı.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
