Kür və Araz transsərhəd çaylarında biogen maddələrin miqdarı normadan dəfələrlə artıq olmuşdur
Bakı, 4 mart (AZƏRTAC). Ekologiya və Təbii Sərvətlər Nazirliyi Ətraf Mühit üzrə Milli Monitorinq Departamentinin Kür və Araz transsərhəd çaylarında fevral ayının üçüncü ongünlüyü üçün apardığı monitorinqin nəticələri açıqlanmışdır.
Nazirliyin mətbuat xidmətindən AZƏRTAC-a bildirmişlər ki, monitorinqin nəticələrinə əsasən, Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarı normadan dəfələrlə artıq olmuşdur.
Suyun tərkibindəki spesifik çirkləndiricilərdən fenollar Şıxlı-2 məntəqəsində 5, Ağstafaçayda və Ağstafaçay su anbarında 4 dəfə yol verilən qatılıq həddini keçmişdir. Fenolların Araz çayının məntəqələrində - Horadizdə 3, Birinci Şahsevəndə və Bəhramtəpədə 4 dəfə yol verilən qatılıq həddindən artıq olduğu qeydə alınmışdır.
Mis birləşmələri isə Kür və Araz çayları üzrə bütün məntəqələrdə norma daxilində tərəddüd etmişdir.
Suyun oksigen rejiminin bütün məntəqələrdə sanitar norma daxilində dəyişdiyi müəyyən edilmişdir.
Bölmənin digər xəbərləri
