Bakı, 17 avqust, AZƏRTAC

Kvant məlumatların saxlanmasında ani bir irəliləyişlə tədqiqatçılar fotonlardan istifadə etməklə elektrik kvant vəziyyətlərini səs dalğalarına çevirmək üçün üsul hazırlayıblar. Məlum olduğu kimi, kvant hesablamaları saxlamaq üçün adi hesablamalara nisbətən daha böyük həcmdə yaddaş lazım olurdu.

AZƏRTAC “SciTechDaily” saytına istinadla xəbər verir ki, Kaliforniya Texnologiyalar Universitetinin Elektrik mühəndisliyi və tətbiqi fizika kafedrasının dosenti Mohammad Mirhosseini laboratoriyada həyata keçirdiyi gündəlik sınaqlardan biri zamanı kvant məlumatın səs dalğası şəklində yaddaşa yazılması və əskinə, səs dalğasının formatını kvanta çevirməyin üsulunu kəşf edib.

Mohammad Mirhosseini qeyd edib ki, hələlik mühəndislər üçün əlverişli olmasa da, gələcəkdə bu üsul elektrik dövrələri tərəfindən yığılan kvant informasiyanın depolanması üçün ən əlverişli üsul olacaq.