Lənkəranda Aşura mərasimi keçirmək istəyən şəxslər saxlanılıblar
Lənkəran, 30 avqust, Bağır Əliyev, AZƏRTAC
Koronavirus pandemiyası ilə mübarizə məqsədilə Azərbaycanda tətbiq edilən xüsusi karantin rejiminin tələblərinə əsasən ölkə ərazisində bütün kütləvi tədbirlərin, o cümlədən dini ayinlərin keçirilməsi, ictimai və digər yerlərdə şəxslərin 5-10 nəfərdən artıq qruplarda cəmləşməsi qadağan edilib, məscidlərin fəaliyyəti dayandırılıb. Buna baxmayaraq, xüsusi karantin rejiminin tələblərini kobud şəkildə pozan vətəndaşlara rast gəlinir.
Daxili İşlər Nazirliyinin mətbuat xidmətinin Lənkəran regional qrupundan AZƏRTAC-ın bölgə müxbirinə verilən məlumata görə, Lənkəran Rayon Polis Şöbəsinin əməkdaşları rayon ərazisində xidmət aparan zaman dini məclislərin keçirilməməsi ilə əlaqədar xəbərdarlıqlara baxmayaraq, bir qrup şəxsin rayonun Velədi kəndi ərazisində Aşura mərasimini keçirməyə cəhd göstərdiyini aşkarlayıblar.
Polis əməkdaşları mərasimin keçirilməsinin qarşısını alıblar. Orada olan 18 nəfər polis şöbəsinə gətirilib və onlarla maarifləndirmə söhbətlər aparılıb. Karantin rejimi qaydalarını pozan həmin şəxslər barəsində qanunamüvafiq tədbirlər görülüb.
Bölmənin digər xəbərləri
