Lənkəranda qurbanlıq heyvan satışı bazarından reportaj FOTO VİDEO
Lənkəran, 5 iyun, İlkin Adıyev, AZƏRTAC
Qurban bayramı yaxınlaşdıqca bölgələrdə, o cümlədən Lənkəranda qurbanlıq heyvanlara tələbat artır. Bayram ərəfəsində alıcılığın getdikcə yüksəlməsi heyvan bazarlarında canlanma yaradıb.
AZƏRTAC-ın bölgə müxbiri xəbər verir ki, Lənkəranda hər il bayram ərəfəsində şəhərin müxtəlif məkanlarında qurbanlıq heyvanların satışı üçün xüsusi məntəqələr təşkil olunur. Bu il də ənənə davam etdirilib və xırdabuynuzlu heyvanların satışına şərait yaradılıb.
Satıcı Valid Kazımzadə bildirir ki, bayram ərəfəsində bazarda canlanma hiss olunur, müştərilər arasında alıcılıq səviyyəsi kifayət qədər yüksəkdir: "Son günlər bazara gələnlərin sayı daha da çoxalıb. Hər kəs büdcəsinə uyğun qurbanlıq axtarır, maraqlanır, qiymətlərlə tanış olur. Ən çox satılan xırdabuynuzlu heyvandır. Qiymətlər də elə dəyişməyib, ötən illə müqayisədə cüzi artım var. Məsələn, ötən il 300 manata satdığım bir quzunu, bu il 330 manata təklif edirəm. Çünki yem, nəqliyyat və digər xərclər bir qədər artıb".
“Elə heyvanlarımız var ki, həm çəkisinə, həm də qiymətinə görə alıcılara sərfəlidir. Bazara gələnlərin çoxu boş qayıtmır. Hər kəs öz imkanına uyğun heyvan tapır. Əsas odur ki, alıcı razı getsin, bayram ovqatı pozulmasın”, - deyə Valid Kazımzadə əlavə edir.
Onun sözlərinə görə, bazarda alıcılıq daha da canlanacaq: "Ənənəvi olaraq, insanlar bayrama bir-iki gün qalmış daha çox bazara üz tutur. Ona görə də həm qiymət, həm də keyfiyyət baxımından vətəndaşlarımızı razı salmağa çalışırıq".
Alıcı Cavad Həbibov da qiymətlərdən və seçim imkanlarından razıdır: "Bayramqabağı bazarlarda heyvan çoxdur, seçim imkanları genişdir. İstər böyük, istərsə də xırdabuynuzlu heyvanlar hər zövqə və büdcəyə uyğundur. Hər il qurbanlıq alıram. Bu il də əvvəlcədən gəlmişik ki, heyvan seçək. Qiymətlərə gəlincə, cüzi artım var, amma bu, normaldır. Əsas odur ki, heyvan sağlam və keyfiyyətli olsun".
Cavad Həbibov deyir ki, bu cür satış məntəqələrinin vaxtında qurulması alıcılar üçün də əlverişli imkan yaradır. "Belə yerlərdə həm sıxlıq olmur, həm də axtardığını tapa bilirsən. Bayram öncəsi belə şəraitin yaradılması çox vacibdir", - deyə o bildirib.
Qeyd edək ki, Lənkəran bazarlarında satışa çıxarılan qurbanlıq heyvanlar əsasən Bərdə, Beyləqan və digər iri heyvandarlıq rayonlarından gətirilir. Bayram günü şəhər ərazisində - Lənkəran şəhər Məhəmməd Füzuli küçəsində mərkəzləşdirilmiş kəsim məntəqəsi fəaliyyət göstərəcək. Mütəxəssislər də vətəndaşlara sanitar-gigiyenik tələblərə uyğun olaraq məhz mərkəzləşdirilmiş kəsim məntəqəsinin xidmətlərindən istifadəni tövsiyə edirlər.
Bölmənin digər xəbərləri
