Leopold və Mstislav Rostropoviçlərin ev-muzeyində şəhidlərin xatirəsi anılıb
Bakı, 21 yanvar, AZƏRTAC
Leopold və Mstislav Rostropoviçlərin ev-muzeyində Litvanın Azərbaycandakı səfirliyi ilə birgə Azərbaycan xalqının 20 Yanvar və Litva xalqının 13 Yanvar faciələrinin ildönümünə həsr olunmuş “Yaddaş yaşayır, çünki şahidlik edir” adlı anım tədbiri keçirilib.
Muzeydən AZƏRTAC-a bildirilib ki, tədbirin məqsədi hər iki xalqın azadlıq və müstəqillik uğrunda verdiyi şəhidlərin xatirəsini yad etmək, tarixi yaddaşı qorumaq və beynəlxalq həmrəyliyi nümayiş etdirmək olub.
Anım tədbiri faciə qurbanlarının xatirəsinin bir dəqiqəlik sükutla anılması ilə başlayıb.
Muzeyin icraçı rəhbəri Günay Əliyeva bildirib ki, Litvanın 13 Yanvar 1991-ci il hadisələri ilə Azərbaycanın 20 Yanvar 1990-cı il faciəsi fərqli zamanlarda baş versə də, eyni mahiyyət daşıyır.
“Maestro Mstislav Rostropoviçin xeyriyyəçilik missiyası onun həyatı boyunca yalnız bir ölkə ilə məhdudlaşmayıb, dünyanın müxtəlif ölkələrində humanitar və mədəni təşəbbüslərlə davam edib. Litva səfirliyi ilə birgə bu tədbirin keçirilməsi təsadüfi deyil. M.Rostropoviçin Litva ilə dərin mənəvi və humanitar bağları olub. Məhz onun şəxsi təşəbbüsü ilə Litvada “Litva uşaqlarına yardım” xeyriyyə fondu yaradılıb və fond bu günədək istedadlı və xəstə uşaqlara dəstək göstərməkdədir”,- deyə G.Əliyeva qeyd edib.
Litvanın ölkəmizdəki səfiri Kestutis Vaşkeleviçusa qeyd edib ki, musiqi, vicdan və mənəvi cəsarət evi olan L. və M.Rostropoviçlərin ev-muzeyində Azərbaycan və Litvanı birləşdirən ortaq xatirə günündə çıxış etmək onun üçün böyük şərəfdir. “Litvalılar Bakıda baş verənləri, azərbaycanlılar da Vilnüsdə baş verənləri heç vaxt unutmayıb. Biz o günlərdə Azərbaycan xalqından aldığımız dəstəyə görə minnətdarıq”,- deyə səfir bildirib.
Diplomat deyib ki, M.Rostropoviç yalnız böyük musiqiçi deyildi. O, həm də insan hüquqlarının müdafiəçisi idi. 1991-ci ildə Litva təcavüzlə üzləşəndə, M.Rostropoviç səssiz qalmadı. O, açıq şəkildə Litvanın müstəqillik hüququnu dəstəklədi və sovet təcavüzünü qınadı, çünki azadlıq olmadan ən gözəl musiqinin də səsi itir.
Tarix və Etnologiya İnstitutu elmi işlər üzrə direktor müavini, tarix elmləri doktoru İlqar Niftəliyev qeyd edib ki, sovet imperiyasının tərkibinə daxil olan bir çox ölkələrlə yanaşı Azərbaycan və Litva xalqları da müstəqillik əldə etmək üçün çətin sınaqdan keçməli olub. Bu azadlıq mülki insanların qanı və canı bahasına əldə edilib.
Tədbir çərçivəsində 20 Yanvar və 13 Yanvar faciələrinə həsr olunmuş video və fotolar nümayiş etdirilib. Videomateriallar hər iki ölkədə baş verən hadisələrin tarixi xronikasını, insan talelərini və azadlıq uğrunda mübarizəni əks etdirib.
Tədbirin mühüm hissəsindən biri də Azərbaycan Milli Konservatoriyasının nəzdində İncəsənət Gimnaziyasının şagirdlərinin əl işlərindən ibarət rəsm sərgisinin nümayişi olub. Sərgilənən əsərlər uşaqların sülhə, azadlığa və insan dəyərlərinə baxışını ifadə etməklə yanaşı, faciələrin gələcək nəsillərin yaddaşında yaşadılmasının vacibliyini ön plana çıxarıb.
Tədbir klassik musiqi konserti ilə davam edib.
Bölmənin digər xəbərləri
