Magistraturaların xüsusi qabiliyyət tələb edən ixtisaslaşmalarına qəbul imtahanları keçiriləcək
Bakı, 9 iyun, AZƏRTAC
İyunun 9-dan 11-dək ali təhsil müəssisələrinin magistraturalarının xüsusi qabiliyyət tələb edən ixtisaslaşmalarına qəbul imtahanları keçiriləcək.
Dövlət İmtahan Mərkəzindən AZƏRTAC-a bildirilib ki, bakalavrlar ali təhsil müəssisələrinin magistraturalarının 68, 69 və 70-ci proqramları üzrə ixtisaslaşmalarına qəbul üçün keçirilən qabiliyyət imtahanlarına buraxılış vərəqələrini iyunun 9-dan çap edə bilərlər. Bakalavrlar elektron ərizələrinə daxil olub buraxılış vərəqələrini, sağlamlıq haqqında bəyannaməni, yaddaş kitabçasını (həmçinin musiqi istiqaməti üzrə qeydiyyatdan keçən bakalavrlar proqram formasını) çap edə bilərlər. Bakalavrlar buraxılış vərəqində qeyd edilən saatdan 30 dəqiqə əvvəl imtahan binasına gəlməli və özü ilə
- şəxsiyyəti təsdiq edən sənədin əslini;
- imtahana buraxılış vərəqəsini;
- sağlamlıq haqqında bəyannaməni (buraxılış vərəqi ilə birlikdə çap edirsiniz və imzalayırsınız. İmtahana buraxılış vərəqəsi şagirdin özündə saxlanıldığı, sağlamlıq haqqında bəyannamə isə imtahan nəzarətçisinə təhvil verildiyi üçün hər iki sənəd ayrıca vərəqdə çap olunmalıdır)
gətirməlidirlər. Qeyd edilən sənədlərdən biri olmadıqda bakalavr imtahana buraxılmır. İmtahan binasına buraxılış vərəqəsində qeyd olunan vaxtda gəlmək tövsiyə olunur.
İmtahanlar iyunun 9-dan 11-dək Bakıda 4 binada keçiriləcək və 29 Qabiliyyət İmtahanı Komissiyası təşkil ediləcək. İmtahana mobil telefon və ya əlavə ötürücü qurğu gətirən şəxslər imtahandan xaric ediləcəklər. İmtahan qaydalarını pozan şəxslərin imtahan nəticələri ləğv ediləcək. İmtahanının nəticəsindən narazı olan bakalavrlar həmin gün ərizə vasitəsilə apellyasiyaya müraciət edə bilərlər. Apellyasiya həmin gün imtahan binasında təşkil edilir. Təkrar imtahan götürülməsi ilə bağlı müraciətlərə baxılmır.
İştirakçılar imtahana tibbi maska ilə gəlməli və onlardan düzgün (burun, ağız və çənə nahiyəsini tam örtməklə) istifadə etməlidirlər. Maskanı çıxarmaq qadağandır və bütün prosesboyu (buraxılış rejimi, imtahan müddəti, imtahan binasının tərk edilməsi) istifadə olunmalıdır.
Mərkəz tərəfindən pandemiya şəraitinin tələblərinə uyğun olaraq imtahan binalarında bir sıra profilaktik tədbirlər - hər bir otağa düşən iştirakçı sayının sosial məsafə prinsipinə uyğun şəkildə tənzimlənməsi, imtahan heyətinin müvafiq qoruyucu vasitələrlə (əlcək, tibbi maska) təmin olunması həyata keçirilib.
Ehtiyat tədbirləri çərçivəsində imtahan binasına daxil olan iştirakçıların məsafədən ölçə bilən elektron termometrlə bədən hərarətləri yoxlanılacaq, zəruri dezinfeksiyaedici vasitələrdən istifadə olunacaq. İmtahana bədən hərarəti 37°C-dən aşağı olan şəxslər buraxılır.
İmtahan iştirakçıları imtahan binasına daxil olmaq üçün yoxlamadan keçərkən sosial məsafəni saxlamaqla şəxsiyyətini təsdiq edən sənədin üz tərəfini DİM əməkdaşının görəcəyi şəkildə ona tərəf uzatmalı və müvəqqəti olaraq maskasını aşağı salaraq üzünü göstərməlidir.
Bölmənin digər xəbərləri
