Marko Veşoviç: “Qarabağ”da qalsam, ən böyük arzum Çempionlar Liqasının qrup mərhələsində oynamaqdır
Bakı, 19 may, AZƏRTAC
Bizim üçün bu il uğurlu mövsüm oldu. Titul qazandıq. Azarkeşlərimizi sevindirdik. Bizə inanan hər kəsə təşəkkür edirəm.
Bu sözləri AZƏRTAC-a açıqlamasında Azərbaycan çempionu olan “Qarabağ”ın futbolçusu Marko Veşoviç deyib.
O, mövsümün əvvəlində qarşıya qoyulan ən böyük hədəfə çatdıqlarını bildirib: “Buna görə çox sevincliyik. İndi bizi qarşıda “Sabah”la kubokun final matçı gözləyir. Bütün fikrimi bu oyuna yönəltmişəm”.
Monteneqro millisinin müdafiəçisi gələcək karyerası barədə bunu söyləyib: “Qarabağ”da qalıb-qalmayacağım barədə dəqiq bir şey deyə bilmərəm. Məsələ açıq olaraq qalıb. Əlbəttə, burada qalsam, ən böyük arzum Çempionlar Liqasının qrup mərhələsində oynamaqdır. Təbii ki, buna nail olmaq asan deyil. Amma sonadək mübarizə aparacağıq”.
Qeyd edək ki, Marko Veşoviçin yayda Ağdam klubu ilə müqaviləsi başa çatacaq.
Bölmənin digər xəbərləri
