Martın 3-ü Beynəlxalq vəhşi təbiət günü elan edilmişdir
Bakı, 16 mart (AZƏRTAC). Tailandın paytaxtı Banqkokda Nəsli və kökü kəsilmək üzrə olan vəhşi fauna və yabanı flora növləri ilə beynəlxalq ticarət haqqında Konvensiyanın (CİTEC) iştirakçılarının XVI konfransı başa çatmışdır.
AZƏRTAC xəbər verir ki, Tailandda keçirilmiş konfransın iştirakçıları CİTEC-in siyahısını fauna və floranın yeni növləri ilə genişləndirmişlər. Həmin növlərlə beynəlxalq ticarət xüsusi nəzarət predmetidir. Konfransda martın 3-ü tarixinin Beynəlxalq vəhşi təbiət günü kimi qeyd olunması haqqında qərar qəbul edilmişdir.
Tədbirdə dövlətlərin bitki, heyvan və balıqların nadir növləri ilə beynəlxalq ticarətin tənzimlənməsinə dair 70-dək təklifi gözdən keçirilmişdir. Təkliflərdən 55-i təsdiq edilmiş, doqquzu qəbul edilməmiş, altısı isə geri götürülmüşdür.
Konfransda iki minədək nümayəndə - 170 dövlətin, aborigen xalqlar qruplarının nümayəndələri, iş adamları iştirak etmişlər. Tədbirdə Azərbaycanı ekologiya və təbii sərvətlər nazirinin müavini Rauf Hacıyevin başçılığı ilə nazirliyin nümayəndə heyəti təmsil etmişdir.
Nümayəndələr CİTEC-in konfransının növbəti sessiyasının 2016-cı ildə Cənubi Afrikada keçirilməsini qərara almışlar.
Bu sessiyada nümayəndələr akula və skatların beş növünü, o cümlədən skatın ən böyük növü olan Mantanı və siyənək fəsiləsindən akulanı II CİTEC-in əlavəsinə daxil etmişlər. Həmin əlavə bu heyvanların leqal şəkildə ovlandığını təsdiq edən xüsusi sənəd olmadan onlarla beynəlxalq ticarətin qadağan olunmasını nəzərdə tutur.
Bu sessiyada həm də qərara alınmışdır ki, CİTEC Beynəlxalq Konvensiyası Asiya, Mərkəzi Amerika və Madaqaskardan çəhrayı ağacın (palisandr) və xurma ağacının satışını tənzimləyəcəkdir. Tropik yarpaqlı ağac növlərinin qiymətli oduncağına sürətlə artan tələbat bu nadir növlərin populyasiyasının tükənməsinə gətirib çıxarmışdır.
Sessiyada ağacdan hazırlanmış musiqi alətlərinin transsərhəd yerdəyişməsi haqqında məsələyə baxılmışdır. İştirakçılar Braziliya palisandrı (çəhrayı ağac) və onun Konvensiyada adları sadalanan digər növləri kimi qiymətli ağac növlərindən hazırlanmış alətlərlə səfərə çıxan musiqiçilər üçün xüsusi prosedurları razılaşdırmışlar.
Konfransda kərgədanların brakonyerliyi ilə mübarizə haqqında qərar qəbul edilmişdir. Ölkələrə təklif edilmişdir ki, kərgədan buynuzu ixracatının tənzimlənməsi üzrə daha sərt daxili normalar qəbul etsinlər və bu heyvandan alınan məhsullara tələbatın azaldılması üzrə strategiya işləyib hazırlasınlar.
Nümayəndələr fil sümüyü ilə qanunsuz ticarət problemlərinin həlli üzrə milli tədbirlərin fəallaşdırılması haqqında qərarı təsdiq etmişlər. Fillərlə ticarətin ümumi qaydaları gözdən keçirilmiş, modernləşdirilmiş və gücləndirilmişdir. Üzv dövlətlər Afrika fillərinin qorunub saxlanması fondunu gücləndirməyi qərara almışlar.
Nəsli və kökü kəsilmək üzrə olan vəhşi fauna və yabanı flora növləri ilə beynəlxalq ticarət haqqında Konvensiya 1975-ci ildə Vaşinqtonda qəbul edilmişdir. Hazırda 176 dövlət onun üzvüdür. Vəhşi heyvan və yabanı bitki növləri CİTEC-in siyahısına düşən kimi onlarla beynəlxalq ticarət nəzarətə götürülür. Nəzarətin dərəcəsi həmin bitki və heyvanların statusundan asılı olaraq, nəsli və kökü kəsilmək üzrə olan heyvan, balıq və bitki növləri ilə nəzarət edilən ticarətdən tutmuş onlarla ticarətin tamamilə qadağan olunmasını ehtiva edir.
Hazırda CİTEC 35 min fauna və flora növü və onlardan hazırlanmış məmulatlarla beynəlxalq ticarəti tənzimləyir.
Bölmənin digər xəbərləri
