Masallıda ərzaq mağazasında istifadə müddəti bitmiş ərzaq məhsulları aşkarlanıb
Bakı, 3 aprel, AZƏRTAC
Qida Təhlükəsizliyi Agentliyi ölkə ərazisində qanunvericiliyin tələbləri çərçivəsində qida təhlükəsizliyinin təmin olunması və istehlakçı hüquqlarının müdafiəsi sahəsində tədbirləri davam etdirir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, tədbirlər çərçivəsində Masallı rayonunun Təzəkənd kəndində fiziki şəxs Qulamov Rafiq İzzət oğluna məxsus ərzaq mağazasında yoxlama aparılıb.
Yoxlama zamanı mağazada qida təhlükəsizliyi sahəsində qüvvədə olan normativ-hüquqi aktların tələblərinin pozulduğu aşkarlanıb. Mağazanın qida təhlükəsizliyi qeydiyyatından keçmədən fəaliyyət göstərdiyi, mağazada satışa təqdim edilən bir sıra qida məhsullarının istifadə müddətinin bitdiyi və mal qonşuluğu prinsipinin pozulduğu, temperatur rejiminə əməl edilmədiyi, satışda olan toyuq əti məhsullarının keyfiyyəti və təhlükəsizliyini təmin edən müvafiq sənədlərin mövcud olmadığı, həmçinin müvafiq təmizlik işlərinin aparılmadığı müəyyən olunub.
Faktla bağlı qanunvericiliyə uyğun olaraq protokol tərtib edilib. Eyni zamanda istifadə müddəti bitmiş məhsulların dövriyyədən çıxarılması və məhv edilməsinə dair qərar qəbul olunub.
Bölmənin digər xəbərləri
