MDU tarixində rekord: tələbə qəbulu planı 98 faiz yerinə yetirilib
Mingəçevir, 26 avqust, AZƏRTAC
2026/2027-ci tədris ili üzrə ali təhsil müəssisələrinin bakalavriat səviyyəsinə keçirilən tələbə qəbulunun ilkin nəticələrinə əsasən, Mingəçevir Dövlət Universiteti (MDU) tarixində ən yüksək göstəriciyə nail olub.
Universitetdən AZƏRTAC-ın bölgə müxbirinə verilən məlumata görə, ali təhsil müəssisəsi üzrə ayrılmış qəbul planının 98,10 faizi yerinə yetirilib. 1717 abituriyentin MDU-nun tələbəsi adını qazanması universitet tarixinə rekord nəticə kimi yazılıb. Qəbul prosesinin statistik təhlili göstərir ki, Mingəçevir Dövlət Universitetində tədris olunan bütün istiqamətlər üzrə abituriyentlərin marağı əhəmiyyətli dərəcədə artıb. İxtisas qrupları üzrə qeydə alınan qəbul göstəriciləri I ixtisas qrupu üzrə 99,20%, II ixtisas qrupu üzrə 96,60%, III ixtisas qrupu üzrə 100%, IV ixtisas qrupu üzrə 100% təşkil edir. Mühəndislik ixtisaslarında, xüsusilə də energetika istiqamətində regionun kadr potensialının inkişaf etdirilməsini daim diqqət mərkəzində saxlayan Mingəçevir Dövlət Universitetində bu sahədə atılan strateji addımlar nəticəsini verib. Belə ki, Azərbaycan Texniki Universiteti (AzTU) ilə birgə həyata keçirilən kadr hazırlığı proqramı çərçivəsində tələbə qəbulu aparılan “Energetika mühəndisliyi” və “Elektrik və elektronika mühəndisliyi” ixtisasları üzrə plan yerləri 100 faiz tələbə qəbulu ilə tamamlanıb. Eyni zamanda, cari tədris ilində ilk dəfə qəbul aparılan “Proseslərin avtomatlaşdırılması mühəndisliyi” ixtisası da abituriyentlərin böyük marağına səbəb olaraq 100 faizlik qəbul göstəricisinə çatıb.
Universitetin beynəlxalq əməkdaşlıq və ikili təcrübə modelinə əsaslanan təşəbbüsləri də uğurla nəticələnib. Qardaş Türkiyənin nüfuzlu ali təhsil ocağı olan Dokuz Eylül Universitetinin dəstəyi ilə yaradılan və ilk dəfə qəbul həyata keçirilən “Beynəlxalq ticarət və logistika” ixtisası üzrə bütün plan yerləri 100 faiz tələbə qəbulu ilə yekunlaşıb. Tədrisin beynəlmiləlləşməsi istiqamətində atılan mühüm addımlardan biri kimi, bu tədris ilindən etibarən MDU-da ilk dəfə ingilis dilində tədrisi nəzərdə tutulan “Kompüter elmləri” və “Turizm işinin təşkili” ixtisasları da 100 faizlik tam qəbul nəticəsi göstərib. İngilisdilli “Turizm işinin təşkili” ixtisası üzrə kadr hazırlığı Azərbaycan Respublikasının Prezidenti İlham Əliyevin 2026-cı il 20 avqust tarixli Sərəncamı ilə təsdiq edilmiş “Azərbaycan Respublikasında turizmin inkişafına dair 2026–2030-cu illər üçün Dövlət Proqramı”nda qarşıya qoyulan vəzifələrə tam uyğun olaraq, həm ölkəmizin, həm də strateji turizm potensialına malik regionumuzun qlobal standartlara cavab verən, xarici dil bilikli peşəkar mütəxəssislərlə təmin edilməsinə töhfə verəcək. Cari ildə müşahidə olunan digər mühüm keyfiyyət göstəricisi universitetə qəbul olanlar arasında yüksək bal toplayan tələbələrin sayının nəzərəçarpacaq dərəcədə yüksəlməsidir. Belə ki, bakalavriat təhsil səviyyəsində qəbul olunan tələbələrdən 23 nəfəri 500–650 bal, 182 nəfəri isə 401–510 bal toplayaraq Mingəçevir Dövlət Universitetini seçib. Mingəçevir Dövlət Universiteti tələbəyönümlü ekosistemin formalaşdırılması, gənclərin fərdi və peşəkar inkişafı istiqamətində yeni imkanlar yaratmağa davam edir. Bu çərçivədə yeni tədris ilindən etibarən tələbələr üçün xüsusi daxili təqaüd proqramlarının təsis olunması, eləcə də xarici tərəfdaş
Müxbir – Vüsalə Cənnətova
Bölmənin digər xəbərləri
