Media: Sərmayədarlar ABŞ bazarlarını tərk edir
Bakı, 5 iyun, AZƏRTAC
Prezident Donald Trampın ticarət müharibələri və ölkənin artan borcları nəticəsində ABŞ aktivlərinə inamın itirilməsi sərmayədarların Birləşmiş Ştatlar bazarlarını tərk etmələrinə səbəb olub.
AZƏRTAC xəbər verir ki, “Financial Times” nəşrinin məlumatına görə, ABŞ liderinin qeyri-sabit ticarət siyasəti son aylarda qlobal bazarları sarsıdıb, ABŞ dollarının kəskin ucuzlaşmasına və “Wall Street” səhmlərinin qiymətinin düşməsinə səbəb olub.
Birləşmiş Ştatların 780 milyard dollarlıq aktivlərini idarə edən “AllianceBernstein” investisiya şirkətinin rəhbəri Set Bernşteyn hesab edir ki, Ağ evin dövlət xərclərinin azaldılması ilə bağlı qanun layihəsini qəbul etmək məqsədəuyğun deyil. Bu, növbəti onillikdə büdcə kəsirinin 2,4 trilyon dollar artmasına səbəb ola bilər.
Xatırladaq ki, aprelin 2-də ABŞ Prezidenti Donald Tramp 185 ölkənin məhsullarına gömrük rüsumunun tətbiq ediləcəyini açıqlayıb. Yeni tarif siyasəti çərçivəsində 10 faizlik universal rüsumlar aprelin 5-də, fərdi rüsumlar isə aprelin 9-da qüvvəyə minib. Bundan başqa, Ağ ev aprelin 3-dən etibarən ölkəyə idxal olunan bütün avtomobillərə 25 faizlik gömrük rüsumu tətbiq edib. Ağ evin rüsum siyasəti dünya fond birjalarının çökməsi ilə nəticələnib.
Vaşinqton aprelin 9-da bir sıra ölkə və ərazilərdə qarşılıqlı idxal rüsumlarını 90 gün müddətinə dayandırıb. ABŞ administrasiyası bunu ticarət danışıqları ilə izah edib.
Bölmənin digər xəbərləri
