MEK-in elektron kataloqu yeni materiallarla zənginləşdirilir
Bakı, 4 aprel, AZƏRTAC
Müasir dövrün tələbinə uyğun olaraq, AMEA-nın Mərkəzi Elmi Kitabxanasında (MEK) məlumatların elektronlaşması sahəsində işlər davam etdirilir. Son üç ayda Azərbaycanşünaslıq və milli rəqəmsal yaddaş şöbəsinin əməkdaşları tərəfindən MEK-in IRBIS proqramına (e-kataloquna) 599 məqalə, 9195 kitab daxil edilib.
MEK-dən AZƏRTAC-a bildirilib ki, bundan əlavə, 2000-dən artıq yeni kartoçka çap edilərək kataloq yeşiklərinə yerləşdirilib, 1000-ə yaxın kitab e-kataloqda redaktə edilib, 253 ədəbiyyat isə milli rəqəmsal yaddaş bazasına aid edilib.
Qeyd edək ki, şöbə Azərbaycanşünaslıq üzrə sənədlərin toplanması, elmi işlənməsi, ənənəvi və elektron informasiya-axtarış aparatının təşkili və aparılması, Azərbaycanın milli, mədəni, elmi irsinin əsaslı formatda mərkəzləşdirilmiş şəkildə qorunub saxlanılması, ölkə və dünya araşdırmaçılarının istifadəsinə verilməsi, eləcə də gələcək nəsillərə ötürülməsi məqsədilə daim yenilənən vahid rəqəmsal bazanın yaradılması işini nəzərdə tutur. Şöbə geniş oxucu kütləsinin ölkəmizə aid informasiya resursları ilə təmin edilməsi üçün həm ənənəvi, həm də elektron kataloqu bu mövzuda materiallarla zənginləşdirir.
Bölmənin digər xəbərləri
