Meksikada COVID-19-a yoluxma hallarının ən yüksək göstəricisi qeydə alınıb
Madrid, 8 iyul, AZƏRTAC
Son sutka ərzində Meksikada koronavirusa 8507 yeni yoluxma halı qeydə alınıb ki, bu da rəsmi statistikaya müvafiq olaraq, ötən il fevralın ortalarından bəri ən yüksək göstəricidir.
AZƏRTAC xəbər verir ki, son sutkada Meksikada koronavirusdan 234 ölüm halı qeydə alınıb. Meksikanın hakimiyyət orqanları etiraf edirlər ki, ölkə pandemiyanın üçüncü dalğasını yaşayır.
Meksikada beşinci həftədir ardıcıl olaraq bütün ölkə üzrə yoluxmaların sayının artması qeydə alınır. Son həftəlik artım 26 faiz təşkil edir.
Əksəriyyətinin hələ peyvəndlənmədiyi 20-39 yaşlı sakinlər arasında yoluxmanın sayının artması, həmçinin koronavirusun yeni variantlarının ölkədə yayılması yerli səhiyyə orqanlarında narahatlıq yaradır.
Meksika Səhiyyə Nazirliyinin son məlumatına müvafiq olaraq, iyunun 16-dək götürülən nümunələrin 30 faizində “qamma” ştammı aşkarlanıb, ikinci yeri “alfa” variantı (20,5 faiz) tutub, “delta” variantı isə 7,8 faiz nümunələrdə özünü göstərib.
Pandemiyanın üçüncü dalğasına və yoluxanların sayının artmasına baxmayaraq, ölkədə turizm aktivliyi aşağı düşməyib. İri kurort şəhəri olan Kankuna son vaxtlar 2 milyondan çox turist gəlib.
Ölkənin hakimiyyət orqanları qeyd edirlər ki, xəstəliyin bu yeni dalğasını dayandırmağın yeganə vasitəsi vaksinləmədir.
Meksikada 33.002.466 nəfər koronavirus əleyhinə vaksinin birinci dozasını alıb, 19.937.022 nəfər isə tam vaksinləmə sxemini keçib.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
