Mərkəzi Asiya ölkələrinin xarici işlər nazirləri Əfqanıstanda yaranan vəziyyəti müzakirə ediblər
Daşkənd, 8 iyul, АZƏRTAC
Özbəkistan, Əfqanıstan, Qazaxıstan, Qırğızıstan, Türkmənistan və Tacikistanın xarici işlər nazirləri onlayn formatda Əfqanıstanda yaranan gərgin vəziyyəti müzakirə ediblər.
AZƏRTAC Özbəkistan Xarici İşlər Nazirliyinin mətbuat xidmətinə istinadla xəbər verir ki, görüşdə Əfqanıstan böhranının sülh yolu ilə həlli, ölkədə siyasi proseslərin inkişafı, iqtisadiyyatın dirçəldilməsi, beynəlxalq terrorizmlə mübarizə məsələləri diqqət mərkəzində olub.
Tərəflər Əfqanıstanla Mərkəzi Asiya ölkələri arasında siyasi, iqtisadi, mədəni-humanitar və digər sahələrdə əməkdaşlığın genişləndirilməsi, dost ölkənin regional inteqrasiya proseslərinə cəlb olunması məsələləri ətrafında fikir mübadiləsi aparıblar.
Görüşdə Mərkəzi Asiya dövlətlərinin dəstəyi ilə Əfqanıstanda energetika və nəqliyyat-kommunikasiya sahələrində müxtəlif infrastruktur layihələrinin həyata keçirilməsinin, pandemiya dövründə ölkəyə humanitar yardım göstərilməsinin əhəmiyyəti də vurğulanıb.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
