“Microsoft Imagine Cup 2016” müsabiqəsinin milli finalının qalibləri müəyyənləşib
Bakı, 17 may, Elvira Məmmədova, AZƏRTAC
Bakıda “Microsoft Imagine Cup 2016” irimiqyaslı beynəlxalq texnologiya müsabiqəsinin milli final mərhələsi keçirilib. “Sosial layihələr”, “İnnovasiya” və “Oyunlar” nominasiyaları üzrə ən yaxşıları olmuş üç komanda müsabiqənin növbəti mərhələsinə vəsiqə qazanıb ki, bu mərhələdə onlayn səsvermə təşkil olunacaq və bununla da komandalar müsabiqənin əsas mükafatı - layihələrin inkişafı üçün 50 min ABŞ dolları uğrunda mübarizə aparmaq şansı əldə edib.
İnnovasiya yarışmasını Təhsil, Rabitə və Yüksək Texnologiyalar nazirliklərinin, Yüksək Texnologiyalar Parkı və "Nar" operatoru "Microsoft Azərbaycan" şirkəti ilə birgə təşkil edib.
AZƏRTAC xəbər verir ki, bu münasibətlə keçirilən tədbirdə rabitə və yüksək texnologiyalar nazirinin müavini Elmir Vəlizadə bildirib ki, belə bir müsabiqənin keçirilməsi, Azərbaycanın bu müsabiqədə iştirak etməsi çox vacib və əhəmiyyətlidir. Sevindirici haldır ki, artıq ilk dəfə Azərbaycan bu müsabiqəyə qatılaraq dünya səviyyəsində ikinci yerə sahib olub. Müsabiqənin məqsədi tələbə və gənclərimiz öz ideyalarını ortaya çıxararaq, onun ətrafında bir komanda formalaşdıra bilsinlər, komanda şəklində çalışaraq yeni layihələr hazırlasınlar.
Təhsil nazirinin müavini Ceyhun Bayramov, Yüksək Texnologiyalar Parkının direktoru Seymur Ağayev və “Nar”ın icraçı direktoru Kent Maknili "Microsoft Azərbaycan" şirkətinin fəaliyyətini yüksək qiymətləndirib, qaliblərə yeni uğurlar arzulayıblar.
Bildirilib ki, “Sosial layihələr”, “İnnovasiya” və “Oyunlar” nominasiyaları üzrə ən yaxşı üç komanda müsabiqənin növbəti mərhələsinə vəsiqə qazanıb ki, bu mərhələdə onlayn səsvermə təşkil olunacaq və bununla da komandalar müsabiqənin əsas mükafatı - layihələrin inkişafı üçün 50 min ABŞ dolları uğrunda mübarizə aparmaq şansı əldə edib.
Layihələrin təqdimatı və müdafiəsinin nəticələrinə əsasən, münsiflər heyəti bu ilin mayında keçiriləcək beynəlxalq müsabiqənin onlayn mərhələsində Azərbaycanı təmsil edəcək 3 komandanın adını müəyyənləşdirib.
“Microsoft Azerbaijan” şirkətinin baş meneceri Sərxan Həşimov bildirib ki, “Microsoft Imagine Cup” - innovasiya sahəsində gənclərin gələcək inkişafı, karyera yüksəlişi və yeni perspektivlərə təkan verən bir müsabiqədir. Məqsədimiz Azərbaycan tələbələrinin istedadını üzə çıxarmaq, onların sabahın bazar tələblərinə hazırlıqlı mütəxəssis kimi yetişdirilmələri üçün şərait yaratmaqdır.
Müsabiqə çərçivəsində ali və peşə təhsili müəssisələrinin tələbələrindən ibarət komandalar üç kateqoriya üzrə iştirak edib - “İnnovasiya”, “Sosial layihələr” və “Oyunlar”. “Sosial layihələr” nominasiyasında SABAH qruplarından olan “TechSOS” komandası qalib gəlib. Komandanın tərkibinə daxil olan Aytac Ağabəyli, Günay Abdullayeva, Nailə İsmayılova və Sənan Quluzadə 3 hissədən ibarət (smartfonlar üçün tətbiq, bulud tətbiqi və avadanlıq) yıxılmanın müəyyən edilməsi sistemini hazırlayıblar. Kiçikhəcmli peycerə bənzər avadanlıq yaşlı insanlar üçün nəzərdə tutulub. Bu məhsul məlumatlandırma və ilkin yardım proseslərini sürətləndirməyə imkan verir.
Digər “İnnovasiya” nominasiyasında “JavaSet” komandası qalib gəlib. Komandanın üzvləri Nicat Cavadov və Yesset Jusupov sifəti müəyyənetmə funksiyası vasitəsilə emosiyaların identifikasiyası layihəsini təqdim ediblər. Bu məhsul müəllimlərə dərslərin daha effektiv və keyfiyyətli olmasına yardım edəcək.
“Oyunlar” nominasiyasında isə “ADA” Universitetinin “The Corp” komandası qalib gəlib. Tələbələr Ülviyyə Məmmədzadə, Toğrul Rəhimli, Ramazan Süleymanlı və Əli Babayev görüntüsü olmayan səsli macəra oyununu hazırlayaraq təqdim ediblər. İnsan və tətbiq arasında aparılan dialoq vasitəsilə oyunun müxtəlif mərhələlərini keçmək mümkündür. Bu məhsul məkan təfəkkürü və məntiqin formalaşmasına yardım edir.
Qeyd edək ki, builki müsabiqədə iştirak edən 25 komandadan 15-i milli seçim turunu və onlayn yarımfinalı uğurla keçib və milli finala vəsiqə qazanıb. Ümumdünya finalında olduğu kimi milli finalda da müsabiqədə iştirak edən ali və peşə təhsili müəssisələrinin tələbələrindən ibarət komandalar üç nominasiya üzrə yarışıblar. Qalib komandalar müsabiqənin beynəlxalq yarımfinalında və bu mərhələdə uğur qazanacaqları təqdirdə Azərbaycanı bu ilin iyulunda keçiriləcək finalda təmsil etməyə şans qazanacaqlar.
Xatırladaq ki, ötən “Microsoft Imagine Cup 2015” müsabiqəsində Azərbaycanı təmsil edən komanda həmin yarışmada uğur qazanıb. Bakı Dövlət Universitetinin və Xəzər Universitetinin tələbələri Nizami İsmayılov, Arif Mövsümzadə, Fidan və Ülviyyə Rüstəmovalardan ibarət “NoObs” komandası “İnnovasiyalar” nominasiyasında ikinci yeri tutub. Bu müsabiqədə ilk dəfə iştirak edən Azərbaycanın komandasına “bluetooth-tənzimçilər” dəsti, həmçinin qaməti əymədən oturmaq və durmaq vərdişi yaradan “Windows Phone” platformalı smartfonlar üçün proqram təminatı olan “Spinal” layihəsi uğur gətirib.
Bölmənin digər xəbərləri
