Mikro sahibkardan maraqlı layihə - Kirayə prosesində xoşagəlməz halların qarşısı alınacaq
Bakı, 14 fevral, AZƏRTAC
2020-ci ildə yaranan “Allrent” MMC Kiçik və Orta Biznesin İnkişafı Agentliyinin (KOBİA) sahibkarlara vergi güzəştləri verən “Startap” şəhadətnaməsini 2023-cü ildə alıb. “Allrent” adlanan layihənin icrasına isə ötən ilin aprel-may aylarından başlanılıb. Hazırda sözügedən layihə “MVP test” (A Minimum Viable Product- red.) versiyadır. Hazırda yeni versiya üzərində işləyirik və cari ilin may ayının sonunda fəaliyyətə başlayacağıq.
Bu barədə AZƏRTAC-a “Allrent” MMC-nin rəhbəri Ceyhun Aslanov bildirib.
C.Aslanov rəhbərlik etdiyi şirkətin bir neçə otellə, 6 rayonda 200-dək mənzillə, həmçinin turizm şirkətləri ilə sıx əməkdaşlıq əlaqələri qurduğunu deyib.
“İnformasiya Texnologiyaları sahəsində digər startap layihələrində də iştirak edirik. Şirkət daha çox turizm fəaliyyəti və gündəlik istirahət mərkəzləri üzrə ixtisaslaşıb. “Allrent” layihəsi gündəlik mənzil axtarışı və istirahət məqsədilə rayonlara üz tutan insanlara, o cümlədən yerli və xarici vətəndaşlara xidmət göstərir. Xarici vətəndaşlar arasında ABŞ, Avropa və ərəb ölkələrindən gələnlər üstünlük təşkil edir”, - deyə şirkətin rəhbəri vurğulayıb.
Qəbələdə 4 otellə əməkdaşlıq etdiyini deyən C.Aslanov hazırda KOBİA ilə əməkdaşlıq çərçivəsində Gəncədə, Göygöl ərazisində ekoturizmlə bağlı mənzillərin rezervasiyası və kirayəsinin yaxın aylarda şirkətin platforması üzərindən yerləşdiriləcəyini qeyd edib. Onun sözlərinə görə, şirkət mənzil sahibləri ilə birbaşa əməkdaşlıq edir. Bu baxımdan, mənzillərin ən münasib qiymətlərini şirkətin platformasında görmək mümkündür. Müştəri mənzili onlayn rezervasiya etdikdən sonra bütün məlumatları bir səhifədə görmə imkanı var. O, evin şəraiti ilə tanış olur, eyni zamanda, mənzilin kirayə qaydaları ilə yanaşı, mənzilin xəritədə yeri barədə məlumat alır.
MMC rəhbəri qeyd edib ki, müştəri ilə mənzil sahibi bir-biri ilə platforma üzərindən əlaqə saxlaya biləcək.
“Ödəniş təhlükəsiz şəraitdə mənzil sahibi tərəfindən platforma üzərindən alınır. Müştəri çox rahat şəkildə platforma üzərindən 5-10 dəqiqə sərf etməklə mənzili rezervasiya edə bilər. Hansı ki, sosial şəbəkələrdə bu proseslər ödənişin edilməsi baxımından heç də şəffaf olmur və ən azı 3 gün vaxt aparır. Biz yalnız mənzil sahiblərinə kirayə xidmətləri göstərmirik, həmçinin mənzillərin ödənişlərinin daha rahat alınması üçün həllər də təklif edirik. Əsas məqsədlərdən biri də platforma vasitəsilə gündəlik kirayə bazarında olan fırıldaqçılıq problemlərini minimuma endirmək, kirayə bazarında olan qeyri-stabil qiymətlərin tənzimlənməsini həyata keçirmək, mənzil sahiblərinin maklerlərdən asılılığını ləğv etmək və müştərilər üçün kirayə prosesində baş verən bütün xoşagəlməz halların qarşısını almaqdır”, - deyə Ceyhun Aslanov əlavə edib.
Bölmənin digər xəbərləri
