Milli Azərbaycan tarixi Muzeyində “20 Yanvar həqiqətlərinin xaricdə yayılması” mövzusunda tədbir keçiriləcəkdir
Bakı, 13 yanvar (AZƏRTAC). Yanvarın 16-da AMEA-nın Milli Azərbaycan Tarixi Muzeyində “20 Yanvar həqiqətlərinin xaricdə yayılması” mövzusunda tədbir keçiriləcəkdir.
Tədbir çərçivəsində, həmçinin “20 Yanvar - hüzn və qürur günü” mövzusunda sərgi açılacaqdır.
Muzeydən AZƏRTAC-a bildirmişlər ki, sərgidə 20 Yanvar şəhidlərinə məxsus olmuş əşyalar və sənədlər nümayiş etdiriləcək, “20 Yanvar gecəsi”, “Müstəqilliyimiz əbədidir və dönməzdir” installyasiyaları, eləcə də müxtəlif illərdə muzeyə hədiyyə edilmiş “20 Yanvar” xalçası və “20 Yanvar” rəsm əsəri təqdim olunacaqdır.
Mərasimdə 1990-cı ilin yanvarında sovet totalitarizminin Azərbaycan xalqına qarşı törətdiyi cinayətdən, 20 Yanvar hadisələrinin Azərbaycan xalqının qəhrəmanlıq tarixində tutduğu yerdən geniş söhbət açılacaqdır. Həmçinin “İrs” beynəlxalq jurnalının 20 yanvar faciəsinə həsr olunmuş və xarici dillərdə çap edilmiş nömrələri paylanacaqdır.
Tədbirə respublikanın müvafiq dövlət idarələrinin nümayəndələrinin, alimlərin, tədqiqatçıların, ali təhsil ocaqlarının müəllim və tələbələrinin iştirakı gözlənilir.
“20 Yanvar - hüzn və qürur günü” sərgisi martın 1-dək davam edəcəkdir.
Bölmənin digər xəbərləri
