Milli Gənc Tamaşaçılar Teatrında premyera - “Düyməcik”
Bakı, 20 aprel, AZƏRTAC
Azərbaycan Dövlət Milli Gənc Tamaşaçılar Teatrında dünya uşaq ədəbiyyatının klassiki, danimarkalı yazıçı Hans Xristian Andersenin eyniadlı əsəri əsasında hazırlanan “Düyməcik” tamaşasının premyerası keçirilib. Səhnə əsəri yazıçının 220 illiyinə həsr olunub.
Tamaşanın quruluşçu rejissoru Ayla Osmanova AZƏRTAC-a açıqlamasında bildirib ki, bu, klassik versiyadan xeyli fərqlənir. “Nağılın maraqlı və fərqli təqdimatı üçün əlavə obrazlar yaratdıq – vərəq və qələm. Bu obrazlar sanki Andersenin yazı alətləri, onun yaradıcılığının canlı şahidləridir. Nağılın hekayəsini uşaqlara onlar danışır. Yazıçı səhnəyə daxil olduqda isə onlar geri çəkilərək yerini əsərin qəhrəmanlarına verirlər. Tamaşa əsas ideya olaraq insanın başına nə gəlirsə-gəlsin, öz düz yolundan dönməməsini, daxili gücə və qərarlılığa sahib olmağın vacibliyini təbliğ edir”,- deyə A.Osmanova əlavə edib.
Rejissorun sözlərinə görə, 14 gün ərzində gərgin iş prosesi nəticəsində ərsəyə gələn tamaşada ümumilikdə 11-12 obraz təqdim olunub.
Tamaşada əsas obrazı – Düyməciyi canlandıran aktrisa Aydan Həsənzadə qeyd edib ki, bu səhnə əsəri bir ruhun özünü axtarması, öz yerini tapması haqqındadır. Düyməciyin yol boyu müxtəlif sınaqlardan keçdiyini, yeni mühitlərə düşdüyünü diqqətə çatdıran aktrisa hekayənin xoşbəxt sonluqla bitdiyini deyib.
Tamaşada 3 fərqli obrazı canlandıran aktrisa Gülbəniz Lətifova belə əsərlərin müasir təqdimatla tamaşaçılara çatdırılmasını sevindirici hal olaraq qiymətləndirib.
Aktrisa İlahə Əmirxanova isə “Düyməcik” vasitəsilə insanlara mehribanlıq, dostluq və müdriklik aşıladıqlarını söyləyib. O, xoşbəxtliyə gedən yolun saf ürəkdən və mərhəmətli düşüncədən keçdiyini xatırladıb.
Tamaşanın səhnə tərtibatı üzərində Şahin Hüseynli və Yekaterina Xaritonova, musiqi tərtibatı üzərində Aygül Quliyeva, rejissor assistenti kimi isə Nəsibə Canəliyeva çalışıb. Tamaşanın plastik həlli Ceyhun Dadaşova aiddir.
Bölmənin digər xəbərləri
