MİLLİ MƏCLİSİN DAİMİ KOMİSSİYASININ İCLASINDA
Komissiyanın sədri Hadi Rəcəbli deputat həmkarlarını Milli Məclisin payız sessiyasının başlanması münasibətilə təbrik etdikdən sonra layihələr barədə məlumat verərək demişdir ki, Azərbaycan Prezidentinin qanunvericilik təşəbbüsü ilə parlamentə göndərilmiş bu qanun layihələri vətəndaşların sosial mənafelərinin gücləndirilməsinə və qanunvericilik bazasının təkmilləşdirilməsinə xidmət edir. Azərbaycanın Avropaya inteqrasiyası, ölkəmizin sosial-iqtisadi inkişafı “Həmkarlar İttifaqları haqqında” Qanuna dəyişikliklərin edilməsi zərurətini yaratmışdır. Layihənin preambula hissəsinə təklif olunan dəyişiklikdə deyilir ki, bu qanun İnsan Hüquqlarının Ümumi Bəyannaməsinə, Beynəlxalq Əmək Təşkilatının konvensiya və tövsiyələrinə, Avropa Sosial Xartiyasına uyğun olaraq Azərbaycan Respublikasında həmkarlar ittifaqlarının hüquqlarının, onların üzvlərinin əmək, sosial, iqtisadi hüquqlarının və qanuni mənafelərinin müdafiəsi üçün fəaliyyət təminatlarını müəyyən edir. Qanuna təklif olunan digər dəyişikliklər redaktə və texniki xarakter daşıyır. Digər layihədə isə Azərbaycan Respublikasının Su Məcəlləsinə, Əmək Məcəlləsinə, İnzibati Xətalar Məcəlləsinə, Ailə Məcəlləsinə, “Bələdiyyələrin statusu haqqında”, “Sosial sığorta haqqında” qanunlara dəyişikliklərin edilməsi nəzərdə tutulur. Əlavələrdə və dəyişikliklərdə deyilir ki, ailə kəndli təsərrüfatlarının hər bir üzvü minimum aylıq əməkhaqqının 2 faizi miqdarında məcburi dövlət sosial sığorta haqqı ödəməlidirlər. Bələdiyyələr tərəfindən verilən vəsiqə ailə kəndli təsərrüfatı üzvlərinin əmək fəaliyyətini və əmək stajını təsdiq edən sənəd hesab olunacaqdır. Ailə kəndli təsərrüfatı üzvləri bələdiyyələrdə uçota durmadıqda isə şərti maliyyə vahidinin 5 mislindən 10 mislinədək cərimə olunacaqlar.
Sonra Azərbaycan Həmkarlar İttifaqları Konfederasiyası Aparatının rəhbəri Həsən Cəfərov, Dövlət Sosial Müdafiə Fondunun idarə rəisi İdris İsayev qanun layihələri ilə əlaqədar ətraflı məlumat vermişlər.
Qanun layihələri təsdiqlənmək üçün Milli Məclisin payız sessiyasının gündəliyinə tövsiyə olunmuş, komissiyanın payız sessiyası üçün iş planı təsdiqlənmişdir.
Bölmənin digər xəbərləri
