Milli Mətbuat Günü Şirvanda bir qrup media nümayəndəsi ilə görüş olub
Şirvan, 22 iyul, Aydın Yavərzadə, AZƏRTAC
Şirvan Şəhər İcra Hakimiyyətinin başçısı İlqar Abbasov Azərbaycanda milli mətbuatın yaranmasının 147 illiyi və 22 İyul Milli Mətbuat Günü ilə əlaqədar bir qrup media nümayəndəsi ilə görüş keçirib.
AZƏRTAC-ın bölgə müxbiri xəbər verir ki, media nümayəndələri ilə təşkil olunan görüş Şirvan Şəhər İcra Hakimiyyətinin inzibati binasında gerçəkləşib. Görüşdə Şirvan Şəhər İcra Hakimiyyətinin başçısı İlqar Abbasov ulu öndər Heydər Əliyevin respublikamıza rəhbərliyi dövrdə milli mətbuata göstərdiyi diqqət və qayğıdan, mətbuatın inkişafına mane olan məhdudiyyətlərin aradan qaldırılmasından, 1998-ci il avqust ayının 6-da senzuranın ləğv edilməsindən, qəzet və jurnalların sayının, dövriyyəsinin artmasından, maddi texniki bazasının möhkəmlənməsindən danışıb. Bu gün də mətbuata münasibətdə Heydər Əliyev siyasətinin və ənənələrinin Prezident İlham Əliyev tərəfindən uğurla davam etdirildiyini bildirib. Mətbuatın inkişafı üçün respublikamızda hər cür şəraitin yaradıldığını, fədakar jurnalistlərin əməyinin yüksək qiymətləndirildiyini, onlara fəxri adların, orden və medalların verildiyini, sosial müdafiələrinin möhkəmləndirilməsi istiqamətində zəruri tədbirlərin görüldüyünü faktlarla diqqətə çatdırıb. Azərbaycan milli mətbuatının yarandığı gündən həmişə qabaqcıl ideyaların carçısı olduğunu, dövrün, zamanın, ictimai-siyasi həyatın güzgüsünə çevrildiyini, milli şüurun, yeni ideyaların formalaşmasına, mədəniyyətin inkişafına böyük töhfələr verdiyini vurğulayıb. Jurnalistlərə sistemli dövlət qayğısının ölkəmizdə sosial ədalət və şəffaflığın təmin edilməsinə xidmət etməsinin, qloballaşma və informasiya dövründə bu şəffaflığın hər bir idarə və müəssisədə, kollektivdə də təmin olunmasının, jurnalist-məmur arasında normal işgüzar münasibətlərin qurulmasının önəmindən danışıb. Bu münasibətlərin daha sağlam, işgüzar əsaslar üzərində qurulması üçün jurnalistlərin öz nüfuzlarını qorumalı, peşəkarlıq səviyyələrini artırmalı, qərəzçiliyə yol verməməli, ədalətli, obyektiv mövqe nümayiş etdirməli olduğunu bildirib. Mətbuatın əsas diqqətinin milli məsələlərin, problemlərin həllinə, dövlətin möhkəmlənməsinə, oxucularda milli şüurun və yüksək vətənpərvərlik ruhunun formalaşmasına yönəlməsinin vacibliyini qeyd edib.
İ.Abbasov mətbuat işçilərinə, yerli “İşıq” qəzetinin əməkdaşlarına və bölgə müxbirlərinə şəhərin ictimai-siyasi həyatında, sosial iqtisadi inkişafında əldə olunan uğurları, aparılan genişmiqyaslı abadlıq, quruculuq işlərini, həyata keçirilən sosial layihələri vaxtaşırı işıqlandırdıqları üçün təşəkkürünü bildirib. Şəhər icra hakimiyyətinin mətbuatla əməkdaşlığa həmişə açıq olduğunu qeyd edib.
Görüşdə çıxış edən “İşıq” qəzetinin baş redaktoru, Şəhər Ağsaqqalar Şurasının sədri Fəxrəddin Rəhimov, AZƏRTAC-ın bölgə müxbiri Aydın Yavərzadə, “APA”nın bölgə müxbiri Əlibəy Zeynalov, “Səs” İnformasiya Agentliyinin bölgə müxbiri İqbal Mikayılov Şirvan şəhərində və ölkədə milli mətbuatın inkişafına, jurnalistlərə göstərilən diqqət və qayğıya görə Azərbaycan Respublikasının Prezidenti, Müzəffər Ali Baş Komandan İlham Əliyevə və Birinci vitse-prezident Mehriban xanım Əliyevaya dərin təşəkkürlərini və minnətdarlıqlarını bildiriblər.
Şirvan Şəhər İcra Hakimiyyətinin başçısı İlqar Abbasov şəhərin ictimai həyatında fəallıqlarına, şəhərdə aparılan abadlıq quruculuq işlərinin, keçirilən mədəni-kütləvi tədbirlərin dövrü mətbuatda, televiziya kanallarında işıqlandırılmasında fəal iştirak etdiklərinə görə və milli mətbuatın yaranmasının 147-ci ildönümü münasibətilə Azərbaycan Dövlət İnformasiya Agentliyi (AZƏRTAC) və “Azərbaycan Televiziya və Radio Verilişləri” Qapalı Səhmdar Cəmiyyətini fəxri fərmanla təltif edib.
Bölmənin digər xəbərləri
