Küveyt dəniz yolu ilə ərazisinə daxil olan dörd İran vətəndaşını saxlayıb
Qahirə, 12 may, AZƏRTAC
Küveyt Daxili İşlər Nazirliyi İran İnqilab Keşikçiləri Korpusuna mənsub olduqları bildirilən dörd nəfəri saxlayıb. Küveyt tərəfinin məlumatına görə, onlar dəniz yolu ilə ölkə ərazisinə keçməyə cəhd ediblər.
AZƏRTAC Küveyt Daxili İşlər Nazirliyinin açıqlamasına istinadla xəbər verir ki, dindirilmə zamanı saxlanılanlar mayın 1-də icarəyə götürdükləri balıqçı qayığı ilə Küveytin şimal qərbində yerləşən ən böyük Bubiyan adasına sızmaq tapşırığı aldıqlarını etiraf ediblər.
Nazirliyin məlumatına görə, sərhəd pozucuları ilə adada yerləşən Küveyt Silahlı Qüvvələrinin şəxsi heyəti arasında baş vermiş atışma nəticəsində bir əsgər yaralanıb. Qrupun iki üzvü - dəniz qüvvələri kapitanı Mənsur Qəmbəri və qayığı idarə edən Əbdüləli Kazım Siəmri qaçıblar. Digər dörd nəfər isə həbs edilib. Həbs olunanlardan ikisi polkovnik, digərləri isə kapitan və baş leytenantdır.
Öz növbəsində, Küveyt Xarici İşlər Nazirliyi bu əməliyyatı qətiyyətlə pisləyərək, İran İslam Respublikasından regionun təhlükəsizliyini təhdid edən və regional və beynəlxalq gərginliyin azaldılması səylərini pozan düşmənçilik hərəkətlərini dərhal və qeyd-şərtsiz dayandırmasını tələb edib. Diqqətə çatdırılıb ki, Küveyt mehriban qonşuluq prinsiplərinə sadiq qalır və ərazisinin digər ölkəyə qarşı düşmənçilik hərəkətləri üçün istifadəsinə icazə vermir.
Bölmənin digər xəbərləri
