Nazir: Türkiyə regiona rəqabət deyil, əməkdaşlıq arealı kimi baxır
Ankara, 12 may, AZƏRTAC
Yaxın Şərqdə rəqabət və əməkdaşlığı birləşdirən yeni münasibətlər sisteminin formalaşması fonunda Türkiyə konstruktiv, balanslaşdırıcı və sabitliyə yönəlmiş dövlət rolunu oynamağa davam edir.
AZƏRTAC xəbər verir ki, bu barədə Türkiyənin milli müdafiə naziri Yaşar Güler Qətərin “Əl-Şərq” qəzetinə verdiyi müsahibədə bildirib.
Onun sözlərinə görə, Ankara sərhədlərinin qorunmasını, iqtisadi inteqrasiyanın gücləndirilməsini və enerji təhlükəsizliyinin təmin edilməsini prioritet hesab edir. “Bu məqsədlərə nail olunması müəyyən risklərlə əlaqələndirilir. Körfəzdə təhdidlərin artan qavranılması yeni, daha balanslı təhlükəsizlik arxitekturası axtarışını sürətləndirir”, - deyə o qeyd edib.
Nazir vurğulayıb ki, Türkiyə regiona rəqabət arenası kimi deyil, əməkdaşlıq arealı kimi baxır: “Türkiyənin yanaşmaları dialoq və qarşılıqlı fayda əsasında formalaşır”.
Y.Güler qeyd edib ki, bu mərhələdə müdafiə texnologiyaları və istehsal gücləri dövlətlərin strateji mövqeyini müəyyən edən vacib amillərə çevrilir.
O, həmçinin əmin edib ki, Türkiyə bütün mövcud diplomatik vasitələrdən və vasitəçilik imkanlarından istifadə edərək regional sabitliyə töhfə verməyə davam edəcək.
Bölmənin digər xəbərləri
